СПОРТ

Порысым ӱшанлын, лӱдде шукташ манын…

Эртыше кечылаште Йошкар-Оласе икмыняр спорт сооруженийыште, «Корта» ече базыште армийыш каяш ямдылалтше рвезе-влак коклаште черетан теле спартакиадыште регионнан тӱрлӧ кундемже гыч латвич команде таҥасен.

Кок кечыште ончыкылык салтак-шамыч кирам нєлтымаште, лӱйылтмаште, турникыште шкем нєлтымаште, ече дене таҥасымаште вийыштым тергеныт. Икымше верым Волжский районын командыже налын. Кокымшыш Советский районын, кумшыш Параньга гыч команде-влак  лектыныт.

– Рвезе-влак тыршеныт, молодец улыт. Чыланат сай результатым ончыктеныт, – ойла Волжский районышто физкультур да спортлан вуйын шогышо С.Михайлов. – Ныл рвезе Кугу Корамас кыдалаш школ, икмынярышт Сотнур кыдалаш, тыгак Шарача кыдалаш школла гыч рвезе-влак таҥасеныт. Куандара, рвезе-влак призёр радамыштат улыт. Тыге нуно армийыш каяш ямде лийыт, лӱдде да куштылгын шке порысыштым шукташ тӱҥалыт.

– Рвезе-влак чыланат чот тыршеныт. Шукышт куд эн  тале коклашке логалыныт. Тыршымышт арам лийын огыл, шонем. Поснак Рома Иванов ден Станислав Петровым палемдыме шуэш. Нуно «Юл кундемын Зарницыже» таҥасымаштат вийыштым тергеныт. Сандене опытанрак улыт манашат лиеш, – ойла Шарача кыдалаш школышто ОБЖ-м туныктышо В.Иванов.

Абсолютный чемпион – Советский район гыч Дамир Галяутдинов. Тудо кирам нєлтымаште да лӱйылтмаште икымше лийын.

– Мый ончылгочак ямдылалтынам. Ийготем дене моло деч ик ийлан изирак улам, сандене тыгай спартакиадыште эше ик гана вийым тергаш йєн уло, – ойла Дамир. – Латкуд килограмм нелытан кирам шола, тыгак пурла кид дене 56 гана нєлталынам. Турникыште шкем нєлтымаште изиш начаррак ыле, а лӱйылташ сайын ямдылат, мемнан сай да шерге винтовко уло. Ечыгорно чапле, сандене ечыжат молгунамсе деч писынрак кайыш. Ончыкыжым военный лияш шонем.

Ты кечынак теле полиатлон дене таҥасымаш иктешлалтын. Тушто абсолютный чемпион – Морко районысо 6-шо №-ан школ гыч Тигран Арутюнян. Рвезе 10-шо классыште тунемеш. Поснак ечыгорнышто сай результатым ончыкта.

– Ты гана ече дене таҥасымаште чыла коклаште икымше лийынам. Лӱйылтмаште сай результатым ончыктенам, чылаже 74 очком погенам, а турникыште шкем нєлтымаште – начаррак, – манеш Тигран.   

Рвезе-влак таҥасымашлан умбакыже ямдылалтыт, вет ончылно – кеҥеж спартакиаде. Тудыжо май мучаште лиеш.

Е.ЭШКИНИНА

Авторын фотожо

Опубликовать в Одноклассники

Добавить комментарий