САМЫРЫК ТУКЫМ

Порылык тӱням утара

5 декабрь – волонтёр кече. Марий элыште шке кумылын поро пашаш ушнышо-влак тӱрлӧ аланыште тыршат. Мо дене  ты сомыл самырык-влакым шкеж деке кумылаҥден – айста пален налына.

Олеся Соловьева, МарГУ-н студентше:

– Волонтёр – поро пашам шуктышо, весылан пайдам кондышо еҥ. Йоче годсек школ, ола, район кӱкшытысӧ мероприятийлаш ушненам. Университетыште поро кумылым ончыкташ йӧн эшеат шукемын. Тиде сомылым у  йолташым муаш полша.

Татьяна Пуговкина, сеҥымаш волонтёр:

– Куд ий ончыч ик пайремым эртарымашке полышкалыше семын ушненам. Мыйым авалтыше куан кумыл тиде пашам умбакыже шуяш, тале волонтёр лияш шонымашым луктын. Кызыт студент улам. Волонтёр пашалан жапем шагалрак гынат, йӧн лекме семын эре ушнем. Тиде мылам вийым ешара.

Юлия Подузова, тӱвыра волонтёр:

–  Тӱвыра волонтёр-влак нерген авам деч колынам. Тунамак ты ушемын вуйлатышыжлан серышым возен колтенам. Пандемийлан кӧра мероприятий-влак шагал улыт, шукыжо онлайн йӧн полшымо дене эртат.

Софья Ильина, турволонтёр:

Волонтёр – весылан полыш кидым шуялташ ямде улшо еҥ. Ты корно кажнын иктаж-мом ыштен ончымо гыч тӱҥалын. Доброволец радамыш ушнымо шкем кӱлешан улмым шижаш полша.

О.МОШКИНА

Опубликовать в Одноклассники

Добавить комментарий