Республикысе йоча клинический эмлымвер (Йошкар-Ола) ВТБ банкын «Тӱня шинчавӱд деч посна» поро кумыл программыштыже участвоватла. Тиде акцийын кышкарыштыже банк реабилитаций отделенийлан медицине оборудованийым налаш 1,5 млн. теҥгем ойырен.
ВТБ банкын йоча медицине тӧнеж-влаклан полшаш виктаралтше «Тӱня шинчавӱд деч посна» поро кумыл акцийже 2003 ий гыч пашам ышта. Программе кышкарыште банк йоча эмлымвер-влаклан шергакан медицине оборудовнийым, эмым, кучылтмо материалым налаш оксам ойыра. Таче кечылан программе Российысе 50 регионымат авалтен шуктен.
5 октябрьыште 11 шагатлан Республикысе йоча клинический эмлымверыште (Йошкар-Ола, Медицинский урем, 10-шо пӧрт) поро кумыл акцийлан пӧлеклалтше мероприятий эртаралтеш. Тушко ВТБ банкын, ола администрацийын, Тазалыкым аралыме министерствын пашаеҥышт, тыгак «Ласкан малыза, йоча-влак» телепередачын геройжо, йоча мурым возышо да мурышо Владимир Щукин, тӱнямбал классын спорт мастерже, «КамАЗ-мастер» командын пилотшо, «Порсын корно — 2017» раллин ший призёржо Антон Шибалов толыт.
М.ИВАНОВА.
