Таче, 28 ноябрьыште, Российыште Поро кумылым вияҥдыме шотышто «Чаманыде пуымо кушкыжмо» мер инициативе эрта. Тиде кечын акцийын чыла участникшылан поро пашам ышташ темлалтеш. Акцийыш, келшыше форматым – уремысе, надырым погымо акцийым, чолга волонтёр-влакым саламлыме, поро кумылым ончыктышо-влак нерген корпоратив сайтлаште каласкалыме, социальный сетьлаште уверым пуымо да моло пашам – ойырен налын, чыла кумылан еҥ ден организаций ушнен кертыт.
Кампаний шукырак калыкым, кугурак кумдыкым авалтыже манын, акцийын участникше-влак инициативын «Чаманыде пуымо кушкыжмо» брендшым кучылтыт.
Проектын Российысе организаторжо – Филантропийлан вияҥаш полшышо «КАФ» фонд. Тудын пашаже поро кумыл программе, грант конкурс, консультаций сынан проект-влакым виктарыме, шымлымашым эртарыме дене кылдалтын.
«Чаманыде пуымо кушкыжмо» инициативыш таче кечылан 300 утла партнёр ушнен. Информацийым пуышо кампанийын сайтше: www.щедрыйвторник.рф. Акций шотышто лекше чыла йодышым «КАФ» фондын 8 (495) 792-59-29 номеран телефонжо да givingtuesday@cafrussia.ru. электрон адресше дене рашемдаш лиеш.
Чаманыде пуымо кушкыжмо – поро пашам ыштыме жап.
М.ИВАНОВА.
