Йошкар-Оласе йоча больницын Л.И.Соколова лӱмеш 5-ше №-ан поликлиникыштыже республикысе СМИ-н журналистше-влаклан «Здравоохранений» национальный проектын «Марий Эл Республикыште икшыве-влаклан медицине полышым пуаш кызытсе жаплан келшыше инфраструктурым ыштен, йоча здравоохраненийым вияҥдыме программе» региональный проект шотышто брифинг лийын.
Йоча больницын тӱҥ врачше Ю.Зейтулаева (снимкыште) тений медицине организацийлашке, ты шотышто рӱдоласе йоча поликлиникылашкат шыҥдаралтше перегыше производствын технологийже дене палдарен.
Журналист-шамычлан 5-ше №-ан поликлиникын уэмдыме кӧргыжым ончал савырнаш йӧн лийын. Тыште граждан-влакым вашлийме, врач-шамычын да лабораторийын пашаштым виктарыме, таза ден черле пациент-влакым тӱрлӧ омса гыч пуртымо да коридорлашке колтымо у логикым ыштыме.
Чыла тидым – черетым иземдыме, докторын ӱжмыжым йӧнан верыште вучымо, врачын пашажым шагалемдыме, кагаз сомылым иземдыме, оксам аныклыме процедурым – пациент медицине тӧнежыште шагалрак жап лийже манын ыштыме.
Республикысе поликлинике-влакым 2018 ий гыч у оборудований дене шыҥдараш тӱҥалме. Ӱмаште 30 млн. утла теҥгеш 40 единице медоборудованийым налме. Тений 1-ше №-ан поликлиникыш 12 млн. утла теҥгеаш цифран у рентген диагностике аппаратым шындыме, тӧрлатыме (восстановительный) медицине отделенийыш йолын механотерапийжылан аппаратым (лӱмын ямдылыме велотренажёр, тудо поснак «ДЦП» диагнозан йоча-шамычлан кӱлеш) налме.
Йоча здравоохраненийым вияҥдыме региональный проектым илышыш пуртымо кышкарыште республикланна 2019-2020 ийлаште 134 млн. теҥгеш 86 единице оборудованийым налаш палемдыме. Нуным Йошкар-Оласе йоча больницылан веле огыл, тыгак Йоча республиканский клинический больницылан, Козьмодемьянск межрайонный да Волжск оласе рӱдӧ больнице-шамычлан ойыраш лийме.
М.ИВАНОВА
