УВЕР ЙОГЫН

«Полшымыжлан» эрык деч посна коденыт

Федеральный налог службын Йошкар-Оласе инспекцийжын ончычсо вуйлатышыже Владимир Чекушкинлан оласе суд титаклыме приговорым луктын, палдара РФ-н Генеральный прокуратуржо.

2005 ий июнь гыч 2016 ий декабрь марте «аралтышым ыштымыжлан» да налог орган-влакын преступлений ваштареш чарыше мерым ыштымышт олмеш паленак чаракым ыштыдымашыштлан Чекушкин строительный материалым ямдылыме пашам шуктышо коммерческий организацийын директоржо деч 25% ужашым налын. Тудын кугытшо 4 миллион теҥгем эртен. Но ты ужашым ончычсо чиновник вес еҥ ӱмбаке оформитлен.

Генпрокуратурын данныйже почеш, Чекушкин тыгак дивиденд семын 3,7 миллион утла теҥгем, кум пачерым да 4,5 миллион теҥгеаш чоҥымо материалым налын. Взяткын тӱрыс кугытшо 18 миллион теҥгем эртен, палдара Генеральный прокуратур.

Суд Чекушкиным 9 ийлан эрык деч посна кодаш, тудым пеҥгыде режиман колонийыш колташ да 18,2 миллион теҥге штрафым тӱлыкташ пунчалым луктын. Тыгак «Марий Эл Республикын сулло экономистше» чап лӱмжым кораҥдаш да кугыжаныш кучем органлаште кум ий пашам ышташ права деч посна кодаш пунчалын.

Л.КАМАЛЕТДИНОВА

Опубликовать в Одноклассники

Добавить комментарий