Марий Элыште шодым искусственно вентилироватлыме «Авента-М» аппарат дене пайдаланымым чарныме.
9 да 12 майыште Москвасе С.И.Спасокукоцкий лӱмеш клинический больницыште да Санкт-Петербургысо Шнуй Георгийын больницыштыже лийше пожар да тидлан кӧра куд еҥын, ты шотыштак коронавирус деч эмлалтше пациент-шамычын, колымыж деч вара Росздравнадзор тений 1 апрель деч вара лукмо шодым искусственно вентилироватлыме «Авента-М» аппаратым ужалаш да пациентлан полышым пуымаште кучылташ чарен. Кызыт тудо нине аппарат-шамычын качествыштым да лӱдыкшыдымылыкыштым терга.
Марий Эл Минздравын пресс-службыжын увертарымыж почеш, майыште республикна тыгай маркан вич аппаратым налын. Росздравнадзорын кӱштымыж почеш, кКызыт нунын дене пайдаланымым чарныме.
М.ИВАНОВА
