СОЦИАЛ ИЛЫШ ТАЗАЛЫК

Поликлиникын пашажым саемдыме

Холышто – теҥгыл, кулер, толшо пациент-влаклан полшышо дежурный администратор, регистратурышто – посна ойырымо телефон линий… Чыла тиде Йошкар-Оласе 4-ше №-ан поликлиникыште палемдыме ситыдымашым кораҥдыме да калыклан медицине полышым сайынрак пуымо мероприятий-влак кокла гыч ужашыже гына.

Тылеч посна, Тазалыкым аралыме министерствын данныйже почеш, медицине тӧнежын регистратурыштыжо икмыняр окнам ешарыме, мӱшкыран ӱдырамаш ден стоматологический пациент-влаклан тудым посна почмо, регистратор-шамыч дене пациент-влак дене мутланыме этикым шуктымо шотышто кутырымо.

Тыгай вашталтыш Марий Эл вуйлатышын обязанностьшым жаплан шуктышо Александр Евстифеевын поликлиникыш кок арня ончыч миен коштмыжо да тушто пациент-влак дене мутланыме гыч  поликлиникын тӱҥ врачшылан, тыгак Тазалыкым аралыме министерствылан докторын, поснак аҥысыр специалистын, приёмышкыжо логалме, талонлан эр йӱдымак черетым налме да моло шотышто йодышым пуымыж деч вара лийын. Министерствын палемдымыж почеш, таче кечылан регистратурыш черетым кӱчыкемдыме.

Йошкар-Оласе 1-ше да 4-ше №-ан поликлинике-влакын пашашт дене палыме лийме деч вара Александр Евстифеев пашам ворандарен колтымо шотышто совещанийым эртарен. Тиде теме деке Марий Эл Правительствын заседанийыштыже угыч пӧртылаш сӧрен. Тыге гынат медучреждений-влакын пашашт республикысе кучемын тӱткышыштыжӧ да регионым вуйлатышын личный контрольыштыжо улыт.

М.ИВАНОВА.

 

 

Опубликовать в Одноклассники

Добавить комментарий