20 мартыште палемдалтше Пиалын тӱнямбал кечыж вашеш Йошкар-Олаште «Пиалым – пӧлеклан» акций эрта. Мероприятийым Психолого-педагогический да социальный полышым пуымо «Доверие» республиканский рӱдер ден «Фиеста Парк Активити» веселаҥдыше йоча рӱдер организоватленыт.
19 мартыште 14 шагатлан тӱҥалше пайремыште «Доверие» рӱдерыште социальный услугым налше йоча-шамыч профессиональный повар-кондитер-влакын вуйлатымышт почеш тутло пиццым кӱэштыт, печеньым глазурь дене сӧрастарат, тыгак слайм-лизуным ямдылыме, твистинг (шарик гыч фигурым ыштыме) шотышто мастер-классыште участвоватлат. Кажне йочан чурийышкыже аквагримым пыштат. Тылеч посна чыла икшывылан пӧлек ден сертификатым кучыктат.
Пиалын тӱнямбал кечыже – тиде вашла шыргыжме, ӧндалалтме, весела да поро кумылым пӧлеклыме сай пайрем.
М.ИВАНОВА
