9-13 июньышто Казастаныште кросс-кантри ралли дене тӱнямбал чемпионатын 1-ше этапше эртен. Российын командыштыже Марий Эл гыч «Чыр Мари» команде дене Александр Максимов квадроцикл дене таҥасымаште вийжым терген.
«Акватория 12» пабликын уверже почеш, участник-влаклан 2500 километрым эрташышт логалын. Тушто лавыран, ошман корнымат, тыгак лӱп шокшо игечыштат, ведра гыч оптымо гай йӱр воштат кудал эрташышт логалын. Старт эрден эрак пуалтын.
Ты этапыште Александр бронзо призёр лийын да мӧҥгышкыжӧ (2000 километр наре), шкеак техникым виктарен, кудалын.
Кокымшо кечын, 10 июньышто, марий кундем гыч А.Максимов эн сай результатым ончыктен улмаш. 279 километрым тудо 2 шагатат 35 минутышто кудал эртен. Ойыртемалтше аргентинец М.Андухарам 2 минутат 31 секундлан ончылтен.
Такшым Йошкар-Ола гыч предприниматель, «РИКЦ» ООО-н партнёржо Александр Максимов – икымше российский квадроциклист. Тудо «Africa Eco Race 2017» ралли-марафоныштат вийжым терген, 7-ше верым налын, а «квадроцикл-влак» тӱшкаште тунам икымше верыш лектын.
Саламлена землякнам черетан сеҥымаш дене да пиалан корным, ончыкшымат сай результатым тыланена.
Е.ЭШКИНИНА.
