Марий Элыште ава (еш) капитал гыч тылзе еда тӱлыман выплатылан икымше йодмашым Волжск олаште илыше Юлия Файзреева пуэн. 14 февральыште Россий Пенсий фондын Марий Элысе пӧлкажым вуйлатыше Владимир Орехов, Россий Пенсий фондын Волжск оласе виктемжым вуйлатыше Виктор Пендельский да Волжск оласе администраций вуйлатышым социальный йодыш дене алмаштыше Дмитрий Анисимов Юлиялан ава капиталлан сертификатым, кокымшо йочажлан СНИЛС-ым да тылзе еда тӱлыман выплатылан решенийым кучыктеныт.
Россий Пенсий фондын Волжск оласе виктемышкыже Юлия иканаште кум йодмашым конден: сертификатым налаш, ава капитал дене пайдаланаш да СНИЛС-ым ойыраш. Самырык ава документ-влакым кӱчык жапыште ямдылен.
«Тиде окса ешыштына кугу шӱкалтыш лийшаш», – манеш Юлия. Ава капитал гыч кодшо окса дене еш ончыкыжым илыме верым саемдаш шона.
Таче кечылан республикыштына кокымшо йочам ыштымылан пуымо ава капитал гыч тылзе еда тӱлыман выплатым налшашлан 3 йодмашым пуымо.
Ушештарена: 2018 ий 1 январь деч вара шочшо кокымшо йочалан пуымо ава капитал гыч тылзе еда тӱлыман выплатылан йодмашым ешыште ик еҥлан шотлымаште 15 071 теҥге погыныдымо годым веле пуаш лиеш.
М.ИВАНОВА.
