Курыкмарий район гыч ик ӱдырамаш шояк банкирлан ӱшанен да 500 тӱжем теҥге оксаж деч посна кодын.
Тидын нерген азапыш логалше 29 ияш ӱдырамаш шкежак полицийыш йыҥгыртен увертарен.
Полиций пашаеҥ-шамыч рашемденыт: тудлан палыдыме еҥ йыҥгыртен да банкын лӱдыкшыдымылык службо пашаеҥже улмыж нерген каласен. Пӧръеҥ ӱдырамашым лӱмжӧ да ачалӱмжӧ денак, тыгак паспорт данныйжымат ойлен, вара пуйто тудын счетшо гыч Иваново областьыште оксажым сниматлаш тӧчымӧ нерген увертарен. Тидым писынрак чарен шогалташ манын, банк картшын реквизитшым да смс дене мийыше парольым каласаш йодын. Ӱдырамаш чыла тиде кӱштымым шуктен да … счетшо гыч 500 тӱжем теҥге оксаже «ӱштылалтын». Тылеч ик кече ончыч гына тудо пӧртым чоҥаш банкыште ты кугыт оксам кредит дене налын улмаш. Икмыняр жап гыч ондалалтмыжым умылымеке, тудо полицийыш йыҥгыртен.
Тиде факт шотышто уголовный делам тарватеныт. Кызыт саде шояк банк пашаеҥым кычалыт.
Полиций пашаеҥ-влак эше ик гана ушештарат:
банкын лӱдыкшыдымылык службо пашаеҥже-влак семын йыҥгыртыше-шамычлан ӱшаныман огыл! Тиде мошенник улыт. Нунын дене мутланымым вигак кӱрлман, нимогай данныйымат каласыман, кӱштымышт ден йодмыштым шуктыман огыл. Уке гын чыла тиде ондалалтме да окса деч посна кодмо марте шуктен кертеш.
Л.КАМАЛЕТДИНОВА
