Киров оласе Келшымаш пӧртышто дистанционно эртарыме меоприятий-влак кышкарыште марий Пеледыш пайрем онлайн йон дене эртаралтын.
Саламлыме мутым Марий юмыйӱла ушемын тӱҥ картше Александр Таныгин, Мер Каҥашын ты регионысо ончылъеҥже Александр Макаров ойленыт. Онлайн-пайрем гоч ты йӱлан историйже, марий калык йӱла-влак, кочкыш, вургем денат палдареныт. Концерт номер-влакат ончыкталтыныт.
Тачысе кечылан Киров областьыште пытартыш перепись почеш 29 тӱжем марий ила. Пижанке районысо Марий Ошай ялыште областьысе Марий тӱвыра рӱдерат пашам ышта. Ятыр илемыште чумырымо марий фольклор коллектив-влакат шукертак чапым налыныт.
С.НОСОВА
Снимкыште: онлайн эртарыме Пеледыш пайремым вӱдышо-влак.
