Таче Марий Элыште 14 гыч 30 ияш марте чылаже 139 888 самырык еҥ ила. Тиде чот гыч гыч шагал огыл ӱдыр-рвезе кундемыштына веле огыл, Россий да тӱнямбал кӱкшытлаште чолгалыкым ончыкта. Нунын кокла гыч иктыже – Йошкар-Олаште илыше Андрей Сорокин (снимкыште).
Рӱдоласе 23-шо №-ан кыдалаш школым тунем пытарымеке, тудо Юл кундем кугыжаныш технологий университетыш тунемаш пурен, а кызыт «Техносфере лӱдыкшыдымылык» специальность дене вузын магистратурыштыжо (3-шо курсышто) шинчымашым пога.
23 ияш тиде рвезын чулымлыкшылан ӧраш, а сеҥымашыжлан куанаш гына кодеш. Шукыжым тудо тале организатор, тыгак чолга доброволец (волонтёр) семын палыме:
– 2015, 2016, 2017 ийлаште Андрей Юл кундем федерал округышто «iВолга» молодёжь форумым организоватлыме да эртарыме пашаште тыршен;
– Севастополь олаште Сеҥымашлан 70 ий теммылан пӧлеклалтше Военный-теҥыз парадыште всероссийский волонтёр корпусын посоложо лийын;
– «Утарыше-влакын всероссийский студент корпусышт» мер организацийын регион-шамыч коклаште эртыше X-шо чемпионатыштыже Марий Элын сборный командыжын составышкыже пурен;
– самырык-влаклан эртыше тыгай форумлаште лийын: «Территория смыслов» (2016-шо ий), «Вектор спасения» (2015, 2016-шо ий), Доброволец-влакын всероссийский форумыштышт (2016, 2017-ше ий);
– молодёжь да студент-влакын XIX-ше всероссийский фестивальын участникше;
– Францийыште эртыше SolidaritesJeunessesInternationalworkcamp волонтёр проектын участникше;
– футбол дене FIFA 2018 Тӱнямбал чемпионатыште Марий Эл гыч волонтёр-влак коклаште лийын;
– «ПГТУ-н студент лидерже-2018» конкурсын сеҥышыже.
Волонтёр паша рвезын хоббишкыже савырнен манын ойлашат лиеш. Кеч-могай мероприятий лийже – Андрей нигунамат тыглай гына ончышо-влакын радамыште огыл, тудо эреак ончылно да палемдалтше-влак коклаште. Санденак самырык еҥым «Утарыше-влакын всероссийский студент корпусыштлан 15 ий» шарнымашан медаль, 2016 ийыште республикыште гражданский обороным вияҥдымаште сеҥымашыш шумыжлан Марий Эл Правительствын Чап грамотыж, тыгак Россий МЧС-ын медальже дене палемденыт.
Андрей изинек спортлан шӱман, пытартыш жапыште шукыжым куштылго атлетикылан кумылан, но эн чотшо, очыни, футболым йӧрата, рӱдолан лигыштыже (спортын тиде видшым йӧратыше-влак коклаште) модеш. Тӱрлӧ проектым возымо пашаштат чолгалыкым ончыкта. Иктыштыже, молодёжь проект-влакын всероссийский конкурсыштышт, сеҥышыш лектын. Тудо «Волонтёр да доброволец тӱҥалтышлан полыш» номинацийлан «Лӱдыкшыдымылык культур гыч ончылгоч шижтарыме культур марте» проектым ямдылен.
Кызыт рвезе Юл кундем кугыжаныш технологий университетысе пожарым йӧртышӧ да утарыше студент отрядын командирже, аттестацийым эртыше утарыше. Тӱҥ наставникшылан Андрей «Утарыше-влакын всероссийский студент корпус» мер организацийын регионысо отделенийжын председательже Н.Ивановам шотла.
– Шинчымашым да опытым чыла велымат налаш тыршем да чонемлан келшыше пашам муаш шонем», – ойла самырык еҥ.
Пытартыш жапыште Марий Элыште доброволец-влакын (волонтёр) толкынышт – кугыжаныш молодёжь политикын ик эн кӱлешан направленийже – вияҥеш. Кызыт кундемыште чылаже 45 тӱжем доброволец уло. Тений 8 майыште Марий Эл Республикым вуйлатышын распоряженийже почеш волонтёр толкыным вияҥдыме шотышто Советым ыштыме.
«Республикна пӱртӱс объектлан поян, но эн тӱҥ поянлыкше – калык, ончыкылыкшо – самырык тукым. Талантан молодёжь илышын чыла сферыштыжат шканже верым муын кертше манын, кӱлеш условийым ыштыман», – каласен регион вуйлатыше Александр Евстифеев.
Кундемысе доброволец инфраструктурыш тыгак самырык-влакын тӱрлӧ ушемышт пурат. Тыгайже таче чыла районыштат уло. Нунын кокла гыч ик эн сайын пашам ыштышылан тыгай площадке-шамыч шотлалтыт:
– «Пиалан билет» (Волжск ола);
– «Шонанпыл» (Козьмодемьянск оласе 3-шо №-ан школ);
– «Пырляште вий» (Йоча-влаклан ешартыш образованийым пуышо Кужэҥерысе рӱдер);
– «Акпарсын наследникше-влак» «Курыкмарий районысо Йоча усталык пӧрт);
– Марий Элысе Самырык-влакын полатыштышт волонтёр пашам вияҥдыме рӱдер (2018 ийыште Российыште 13 ик эн ончыл волонтёр ушем-влакын радамышкышт пурен да 200 000 теҥгелан сертификат дене палемдалтын).
Г.Кожевникова.
