27 августышто оперативный штабын заседанийыштыже Марий Эл вуйлатыше Александр Евстифеевлан чодыра кумдыкышто йӱлышӧ вер-влакым пытарыме шотышто сӱрет могай улмо нерген ойленыт.
Палемдыме почеш, ты пашашке тунам эше 105 доброволец, а чылаже 300 утла еҥ ушнен улмаш.
– Кызыт пожар уке. Туге гынат торфан вер-влак эше эҥыт да шикшештыт. Нуным пытарыме паша умбакыже шуйна, – каласен Александр Евстифеев.
Вара ешарен:
– Тулым йӧртымашке МЧС-ын федеральный пашаеҥже-влак, шкенан региональный пожарный-шамыч чолган ушненыт да тыршеныт. Ме пожарный-влакым укомплектоватлыме шотышто пашам шуена. Тыште техникым, пожарым йӧртымӧ средстве, келшыше амуницийым ситарыме шотышто йодыш шога.
Республикыште илыше-влак нерген каласыде огеш лий. Нуно пӱртӱсым, янлык-шамычым нимучашдымын йӧратымыштым ончыктеныт. Тул дене кучедалашат мыняр еҥ кӱлын, тунарын толыныт. Мемнан военный-влак пашам ыштеныт да умбакыже тыршат. Тыглай еҥ-шамыч, кӧмыт тушко каен кертын огытыл, садак шке надырыштым пыштеныт: Самырык-влакын полатышкышт кочкыш йӧрварым, вургемым, антисептикым, аралалтме средствам, ятыр молым конденыт. Чылаштлан таум ыштена.
Тыгак Киров область гыч полшаш толшо-влакын кугу полышыштым палемден да Россий МЧС-ын Киров областьысе тӱҥ управлений вуйлатышыжлан, регионын губернаторжылан да, мутат уке, Россий МЧС министерстве вуйлатышылан, летчик-шамычлан поснак тауштымыж нерген ойлен.
Республик вуйлатыше лишыл кечылаштак чодырам уэш шындаш тӱҥалшаш нерген каласен.
– Сӧрымем семын, шочмо гычак тиде йодыш шотышто пашам ышташ тӱҥалына. Элын президентше тиде неле йодышлан тӱткышым ойырен да тул азап лийше регион-влаклан чодырам уэш шындыме пашаште лектышыш писынрак шушашыштлан федеральный бюджет гыч оксам ойырышаш нерген «Единый Российын» съездыштыже кум кече ончычак ойлен, – пытартышлан палдарен Александр Евстифеев.
Тиде кечынак, 27 августышто, кастене Чуркан ер кундемыште эртыше оперативный штабын заседанийыштыже Марий Эл вуйлатыше Александр Евстифеев «Вятка» кугорным почаш кӱштен.
* * *
Республикыште чодыра пожарым йӧртымӧ шотышто паша умбакыже шуйна. Кызытсе жаплан ситуаций могай улмо нерген 30 августышто эрдене Марий Эл вуйлатыше Александр Евстифеевлан оперштабын дислокаций верыштыже ойленыт.
Палдареныт: кугу тул дене йӱлымаш кызыт уке. Но южо вере эше эҥеш, сандене шикш коеш да шижалтеш. Тидым чарымаште Авиалесоохранын, Росгвардий управленийын, Россий УФСИН-ын Марий Элысе управленийжын, республикын Пӱртӱс поянлык, экологий да йырым-йырысе средам аралыме министерствыжын пашаеҥышт-влак, моло, чылаже 196 еҥ, тыршат.
Построений жапыште регион вуйлатыше нунылан тауштен да шикшештмым тӱрыс пытарымешке пашам чарыман огыл манын ойлен.
– Шкеат ужыда: шикш эше уло. Мемнам алят йӱлымӧ вер-влак улман регион-влак радамыш пуртат. Сандене ме тидым пытарышаш улына. Игече дене палдарыше-влакын уверышт почеш, кушкыжмын да кугарнян йӱр лийшаш. Но, кузе ойлат, «На Бога надейся, а сам не плошай». Садлан чулымын тыршаш тӱҥалына. Эрла да кумышто вертолет-влак пашам ышташ тӱҥалыт. Тиде кугу полыш лиеш, – каласен Александр Евстифеев.
Марий Эл Республикым вуйлатышын организаций да
аналитике виктемжын уверже негызеш
Л.Камалетдинова ямдылен.
