КУЛЬТУР ДА ИСКУССТВО СЫМЫКТЫШ ТЕАТР

Пашам ыштен, чон ласкалыкым налам

 

Лаштыкнан тачысе унаже – артист Светлана Гладышева.

Светлана Морко район Масканур ялеш шочын-кушкын. Изинекак усталык шӱлышан, артист кумылан ӱдыр кыдалаш школ деч вара, 1980 ийыште, ГИТИС-ыш тунемаш пурен. Тудым тунем пытарымеке, М.Шкетан лӱмеш Марий национальный театрыш пашаш толын да латкок ий сценыште модын. Тиддеч вара тудо Марий самырык театрыште, тыгак икмыняр ий элнан рӱдолаштыже тыршен, но чонжо садак Марий кундемышкак шупшын.

Йоча пагыт

– Эше музыкально-художественный интернат-школышто тунемме годым Шкетан лӱмеш театрыш чӱчкыдынак коштынна. Чылажат моткоч оҥайын чучын. Шарнем, «Салика» спектакльым куанен, йӧратен ончен шинченам, артист-влакын модмышт пеш келшен. Тунам артист-влакым моткоч кугу да мастар еҥлан шотленам. Нунын гай кӱкшытыш шуаш нигунамат огеш лий шоненам, – шарналта Светлана.

Но тудо тиде шонымаш дене гына илен огыл. Эреак уым кычалын, эскерен…

– Пӱрымаш деч от шыл, маныт. Айдеме шке корныжым шке тапта. Но тиддеч посна илышыште ала-могай койдымо вий корным виктараш полша, — ойла Светлана. — Ялысе школ деч вара такшым филологлан тунемаш пураш шоненам да чыла документым Марий кугыжаныш педагогический институтыш наҥгаенам. Тиде жапыште вузын ик оҥаштыже актёр-влакым ГИТИС-ыш тунемаш погымо нерген увертарымашым ужынам. Мутат уке, тунам ГИТИС манмыже мом ончыктымым паленжат омыл, но театр пӧлкаш тунемаш погымо нерген раш умыленам. Тунам театр моткоч кугу полатла чучын.

Ялысе ӱдыр вожылшырак лийын гынат, филолог лияш шонымашыжым трукышто вашталтен да шкенжым терген ончаш шонен пыштен, ойырен налме турым эрташ театрыш миен. Тӱҥалтыште ача-аважат пален огытыл улмаш, лач кокымшо турыш толмыж годым ӱдыр кугурак-влаклан мӧҥгыштыжӧ каласен. Аваже моткоч ӧрын, а ачаже самырык ӱдырын шонымашыж почеш каяш темлен. Тудо жапыште ачаже мӱкшым ончен, а аваже почтышто ыштен.

– Кумшо турым эртыше-влакын спискыштым увертарыме кечын ял гыч эр автобус дене Йошкар-Олашке толын шуынам да театр ончылно вучен шогенам. Шыве-шыве йӱр йӱрын. Шагат наре нӧрен шогенам, – тиде татым тачысе кече марте Светлана раш шарна. – Трукышто воктечем Алексей Юзыкайн эртен кайышыжла пылышышкем каласен: «Тый Тихонова улат? Ит ойгыро, тунемаш пуренат». Тиде увер, мутат уке, мыйым моткоч куандарен, но кугурак еҥын ойлымыжым нигӧлан палдараш огыл манын, шып шогенам, а тыгодым капемлан шокшын-йӱштын чучын колтен, куанымем дене пуйто шулдыраҥынам.

Театр, сцене…

Молын семынак Светлананат студент жапше моткоч веселан эртен. Тиде пагыт шуко вашлиймашым, лекцийым, мастер-классым пӧлеклен. А кунар нуно Моско театрыш спектакльым ончаш коштыныт! Тидын нерген С.Гладышева моткоч радамын да чон йӱлен каласкала.

Моско вузым тунем лекмеке, М.Шкетан лӱмеш театрыш пашам ышташ толмыжымат Света пеш сайын шарна. Икымше рольым тудо «Золотая медаль» спектакльыште модын.

– Моткоч тургыжланенам, лӱдынам, шӱмем лектын вочшашла кӱлткен, а сценыже тугай кугула чучын, – воштылеш актрисе.

Тиддеч вара Светлана ятыр постановкышто рольым модмыж дене ончышо-влакым куандарен. Тудлан драмыштат, комедийыштат, йомакыштат рольым ӱшанен пуэныт.

– «Саликаште», «Айвикаште», «Аксар ден Юлавийыште» тӱҥ рольым модаш кажне самырык актрисылан — кугу пиал. Нине постановкышто модмеке, артист-влак ик тошкалтышлан кӱшкырак кӱзат, шонем, – порын шыргыжалын, мут ярымжым ронча Светлана. – Саликам модмым мыят чот сайын шарнем да чӱчкыдынак поро кумылын шарналтем. Эчукын рольжым Иван Смирнов модын.

12 ий марий драме театрыште пашам ыштымеке, С.Гладышева Марий самырык театрыш куснен. Тудыжо тунам ончышо-влаклан икымше гана шке омсажым почын.

– Тиде жапыште Олег Иркабаев культпросветучилищыш театр пӧлкаште студент-влакым сценыште кутыраш туныкташ ӱжын. Адакшым театрыште артист-влакат кӱлыныт, сандене паша верым вашталташ логале, – палемдыш чолга ӱдырамаш.

Сценыште модаш да кушкын толшо тукымым ты пашалан шӱмаҥдаш — манаш веле. Тидлан мыняр ӱнар да чытыш, вий кӱлыт. Тидым Светлана Аркадьевна моткоч сайын пален, чылажымат чытен да туныктымо пашажат чон йодмо сомылышкыжо савырнен. 13 ий утла ты пашам ӱшанлын шуктен. Тыгодымак тудо эше ГИТИС-ын педагогшылан шотлалтын. «Воштончыш» театр студийынат художественный вуйлатышыже С.Гладышевак лийын.

Марий самырык театрын сценыштыже Светлана тӱрлӧ спектакльыште модын: «Любовь — книга золотая», «Айвика», «Изуремыште кугу сӱан» да молымат….

(Материалым умбакыже «Марий Эл» газетыште лудаш лиеш)

Алевтина БАЙКОВА

Опубликовать в Одноклассники

Добавить комментарий