15 июньышто Марий Элыште КОИБ (комплекс обработки избирательных бюллетеней) оператор-влакым туныкташ тӱҥалыныт.
Нине комплекс дене 1 июльышто Россий Федерацийын Конституцийышкыже вашталтышым пуртымо шотышто общероссийский йӱклымаш годым Йошкар-Оласе 84 участкыште пайдаланаш тӱҥалыт.
Тунеммашым участковый избирательный комиссийла гыч решатлыше йӱк праван 168 еҥ эртат. Курс 20 июнь марте шуйна. Тылеч вара тестирований лиеш.
Йӱклымаш кечын КОИБ полшымо дене йӱклымӧ бюллетень-влакым автоматизироватлыме йӧн дене приниматлат да обработатлат, йӱклышӧ-влакын чотыштым рашемдат, протоколыш пуртымо данный-влакын келшен толмыштым, участковый комиссийын йӱклымашын иктешлымашыж нерген протокол-влакын печатьыштым тергат.
Л.КАМЛЕТДИНОВА
