УВЕР ЙОГЫН

Пашам писештарыман

Республикысе правительстве пӧртыштӧ черетан совещанийым эртарымыж годым Марий Эл вуйлатыше Александр Евстифеев нацпроект почеш кажне оралтым чоҥымо годым пашам жапыштыже да сайын шуктымым тӱткын эскераш кӱштен.

— Мый ушештарем: Промышленность, экономически вияҥмаш да торговльо министерстве национальный проект-влакым шуктымо мониторинглан вуйын шога. Да ончыкыжымат тидым ышташ тӱҥалеш, — каласен Александр Евстифеев.

Республикын тазалык аралымаш министрже Марина Панькова 17 ФАП-ым чоҥымо паша кузе кайыме да нуным тений идалык мучаш марте ыштен шуктышаш нерген каласкален. Тыгак тудо «Здравоохранений» нацпроект дене келшышын Йошкар-Олаште санитарный авиацийлан вертолёт площадке ышталтме нерген ойлен. Тидлан республикын бюджетше гыч 8 млн. теҥге ойыралтшаш. Республик вуйлатыше тиде пашам кӱлешанлан шотлен да шуктымо срокым кӱчыкемдаш кӱштен.

Чоҥымо паша, архитектур да илыме вер ден коммунальный озанлык министр Михаил Степановын палдарымыж почеш, «Юлым тазаҥдарымаш» федеральный проект дене келшышын, Марий Турек районышто Ноля эҥерыште эрыктыше сооруженийым чоҥымо да Козьмодемьянскыште тыгаяк сооруженийым уэмден тӧрлатыме паша тений умбакыже шуйна. Икымшыжым 31 октябрьыште, кокымшыжым шыже мучаш марте ыштен шуктышаш улыт. Тыгак министр рӱдолаште Ураев бульварым да Петров уремым умбакыже чоҥымо нергенат каласен.

Молодежный политике, спорт да туризм министр Лидия Батюкова «Демографий» нацпроектын «Спорт – илышын нормыжо» проектшым илышыш пуртымо нерген ойлен. Тудым шыҥдараш тений 94 млн. теҥге бюджет окса ойыралтын. Тышеч 9 млн. теҥге изи спорт площадке-влакым ышташ оборудованийым налаш кучылталтын. Тений тыгак Козьмодемьянскыште да Юриношто стадион-влакым пашашке колтышаш улыт.

Республикын образований да науко министрже Наталья Адамова «Образований» нацпроектым илышыш пуртымо нерген каласкален. Лишыл жапыште Медведево районысо Руэм поселкышто 100 верлан йочасадым да Йошкар-Оласе «Мирный» микрорайонышто 320 верлан дошкольный учрежденийым чоҥаш тӱҥалшаш улыт. «Современная школа» проект дене келшышын, Волжскышто школын у тунемме корпусшо почылтшаш.

— 2020 ийыште ныл дошкольный образований объектым ыштен шуктышаш улыт. Тыге 1010 у вер лийшаш, — палдарен Наталья Адамова.

Республикын социальный вияҥмаш министрже Марина Островскаян ойлымыж почеш, тений шыжым Красный Стекловарыште 100 верлан психоневрологический интернатым пашашке колташ палемдалтеш. Тудо «Старшее поколение» региональный проект дене келшышын чоҥалтеш. Идалык мучаш марте Илалше да инвалид-влаклан «Сосновая роща» интернат-пӧртым уэмден тӧрлатышаш улыт.

Александр Евстифеев чыла объект-влак шотышто пашам писештараш кӱштен.

Марий Эл Республикым вуйлатышын организаций да

аналитике виктемжын уверже-влак негызеш

Л.КАМАЛЕТДИНОВА ямдылен

Опубликовать в Одноклассники

Добавить комментарий