Тений телым Марий Эл гыч икмыняр сонарзе дене Нижегородский областьыш биатлон таҥасымашке мийымем годым ятыр чолга, тале, пашам йӧратыше пӧръеҥ дене палыме лийым. Нунын кокла гыч иктыже – опытан, Параньга кундемын чолга сонарзыже Пётр Герасимов.
Мутат уке, чатлама йӱштӧ игечыште эртаралтше таҥасымаште чыланат пеш тыршышт. Ваче гоч пычалым сакен, ечыгорныштат чулымлыкым ончыктышт, лӱйылтмаштат туралыкышт дене ойыртемалташ тыршышт, но кечыйол йымыктарымылан кӧра изиш пӱсылыкышт йомын ыле.
– Мутат уке, сайрак результатым ончыктымо шуэш ыле, вет стартыш лекше кажне еҥ сеҥаш шона, но кузе лектын, йӧра ынде. Вес гана шке йоҥылышым тӧрлаш тӱҥалына, – мане Пётр Викторович финиш деч вара.
– Те тӱрлӧ кундемыште эртыше таҥасымашлаште вийдам тергеда, тӱрлӧ ситуаций дене тӱкнеда, сонарлашат лектыда, тыгодым тренировкыланат жапым ойыреда. Сонарзе биатлонлан шуко шийвундым луктын пыштыман? – рашемдаш тӧчем мыят.
– Ты вид шулдыжак огыл. Пычалжак коло тӱжемаш, эшеат шергыракшат уло. Тылеч посна ечыже-можо… Тыгодым патронлан монь шагал огыл шийвундым луктын пыштыман. Корныланат шагал огыл лектын возеш. Такшым мемнан сонарзе-влак коклаште биатлон таҥасымаш шкешотан «черыш» савырнен манашат келшен толеш, азартан улына. Мутлан, тений кок тылзе жапыште 30 тӱжем утла теҥгем пытаренам, – ойла П.Герасимов.
Пётр Викторович ял пашаш шуаралтын кушшо айдеме, санденак чыла пашам лӱдде, кӱлеш семын ышта. Зоотехниклан тунем лекмыжат лач веле, вет тудын деке пошкудыжо, палымыже-влакат тӱрлӧ ой-каҥашым, полышым йодын толыт. Чолга сонарзе кертмыж семын полшашак тырша. Тыгодым тунем лекме специальностшо дене ятыр ий пашам ыштен, ончыч зоотехник, вара бригадир сомылымат шуктен. Лийын, пашадар изилан кӧра мӧҥгыштыжє ныл ушкал денат ашнен. Тунамже шудымат шагал огыл ямдылаш кӱлын. Варажым пелашыж дене 16 вуй ава сӧснам ашненыт, игыжым ужаленыт. Игыжлан эсогыл кызытат черет.
Оҥай, но вольыкым йӧратыше чыла шотыштат уста суртоза имньымат ончен, адакшым тыглайым огыл, урлыкашым. Жапше годым тудо пакчам тырмалашат, пареҥгым шындашат йӧрен, тыгодым имне дене таҥасымашлаштат озаж дене ончыко лектын.
Теве тыге Пётр Викторович ял пашан чыла шӧрынжымат авалташ тырша. А сонарлымаш тудлан – шкешотан хобби.
– Яндар юж, мотор марий пӱртӱс, чодыра – мо эше айдемылан кӱлеш! Чылажымат шот дене аклен, чылаж дене пайдаланен моштыман, – манеш шкеже. – Маскам, ир сӧснам пукшаш коштына. Пырчым, шкеак налын, ӱдена. Тидланже иктаж тонн утла пырче кая. Такшым шке ыштыме пашам, тӱҥалме у сомылат мыланем келша веле. Теве сонарзе-влак коклаште биатлон дене таҥасымашат сымыстара. 2017 ийыште ончыч Параньгаште эртаралтше, варажым ӧрдыж кундемыш лектын ик таҥасымаште шке тӱшкаште икымше, общий зачётыштат икымше да команде дене икымше верым налмат ончыкылан сай шўкалтыш лийын, эшеат сай результатым ончыкташ у шӱлышым ешарен. Та‰асымашлаште вашлийын, икте-весым ужын, кутырен, у опыт дене пойдаралтмыжат, илышыш могай-гынат ойыртемым пуртымыжат мыланем пеш шерге. Тек кажне айдеме шкан келшыше пашам ойыра да тудым лийже манын ышта, – мане мучашлан Петр Викторович.
Е.ЭШКИНИНА
