Шернур районысо Марисола книгагудым вуйлатыше Нина Лепёшкина дене мутым вашталташ кече веле огыл, суткат ок сите, очыни. Тыге йытыран кутыра, тынар оҥай дене палдара – лугыч ыштыде, эре колыштмет веле шуэш.
– Тиде пашаш 1998 ий августышто йӧршын вучыдымын толынам. Шкеже бухгалтерлан тунем лектынам, Шернур партий райкомышто, «Нива» совхозышто ыштенам, вара Йошкар-Оласе «Электроавтоматике» заводыш каенам. Тунамак «Торгмаш» заводышто пашам ыштыше курыкмарий рвезе Константин дене палыме лийынам. Икмыняр жап гыч сӱаным ыштышна. Кок ӱдырна шочо. Но 16 ий гыч пелашем ӱмыр лугыч лие, – тунамсе жапым шарналтымыж годым Нина Дмитриевнан логарышкыже комыля кӱзыш. – Тулык ватын пӱрымашыже пеш кочо улмаш… Но Юмо мыйым вес пӧръеҥ, Борис, дене ваш ыштыш. Кокымшо гана марлан лекмемлан нимынярат ом ӧкынӧ: пелашем ӱдырем-влакым шке шочшыжлак йӧрата, мыйымат пеш пагала, чамана, пашаланат моткоч кожмак – кидше чылалан толеш.
Курыкмарий район гыч аваж деке шочмо Овдасолашкыже пӧртылмекше, Нина Дмитриевна шала пашаш коштын, вара ургызылан тунем лектын да ужгам ургымо цехыште 10 ий ыштен. Совхоз пытымек, цехат петырнен, а ӱдырамаш паша деч посна кодын.
– Ик ий пашам ыштен омыл… Шернур районысо рӱдӧ эмлымверыш санитаркылан кайышаш улам ыле, кенета шкенан книгагудышто полышкалыше кӱлеш лие да тышке тольым. 2009 ийыште книгагудым вуйлатыше Галина Алексеевна Соколова пенсийыш кайыш, олмешыже мыйым кодаш темлыш. Лу ий жапыште библиотекарьын пашажлан тунем шуынам ыле гынат, профессиональный шинчымашым Тӱвыра да сымыктыш колледжыште заочно нальым, дипломан специалист лийым, – илышыштыже, манмыла, ик курык почеш весыш кӱзымыж дене палдара Нина Дмитриевна.
Таче Марисола библиотекын фондыштыжо 9600 книга уло. Нина Дмитриевна пашан ветеранже З.Ермакова гай чолга еҥ-шамыч дене пырля тудым пойдаренак шогат. Теве мыйын мийымем кечынат Зинаида Васильевна И.Степанован «Маритӱрыштӧ юмо-влак» книгам кондыш. «Мый лудынам, молат лудышт», – мане. Колым кучаш, поҥгым погаш, книгам, газетым лудаш, таза илыш-йӱла дене кылым кучаш, калык дене пайдале мероприятийым эртараш йӧратыше тиде 73 ияш ӱдырамаш книгагудышко марий газет ден журнал-влакымат ӧлтӧ дене конда. А нуныжым вара верысе-шамыч черет дене лудыт. Книгагудо пелен тыгак «Озавате» («Хозяюшка») клуб пашам ышта. Туштыжо тӱрлӧ ийготан ӱдырамаш-шамыч кидпашаланат, кочкаш шолташат тунемыт, икте-весым, тыгак кундемысе пагалыме, илалше еҥ-влакым шочмо кече денат саламлат, усталык касымат эртарат, пӱртӱсышкат лектыт… Нине мероприятийым ий еда чумырымо фотоальбомыштышт ужаш лиеш.
– Мый библиотекарь профессийыште шке верем муынам. Тудо калык дене чак, икте-весым умылен, пагален, вашла полшен, пашам ышташ, йоча-шамыч дене кутырен мошташ туныктен, – куанен манеш Марисола книгагудым вуйлатыше.
Нина Дмитриевна пенсионер гынат, канаш каяш ок шоно. Ик велым, эше вийже сита, вес велым – ешыште окса шотышто могай-гынат шӱкалтыш. Библиотекымат пеш чаткан куча. Кӧлан мом лудаш келшымым сайын пала. Теве мемнан шагат утларак мутланыме жапыште гына мыняр еҥым обслуживатлыш: пенсионер Зоя Кузнецова шканжат, Ольош пелашыжланат пел сумка книгам оптыш, Алевтина Антонова ден Василий Орехов лудмо икмыняр книгаштым весе дене алмаштышт, 4-ше классыште тунемше Вадим Вайшев черланенат, жапым яра эртарыме деч Б.Заходерын «Мохнатая азбука» сборникше ден А.Усачёвын «Азбука Бабы Яги» книгажым нале, а 77 ийыш тошкалше Алевтина Карсакова, йӱштӧ игече деч лӱдде, Я.Егоровын «Ир шоган» книгажлан тольо… Нина Дмитриевнан тыгай лудшыжо формуляр почеш 800 утлаш погына! Калыкын лудаш кумылан улмыжым шотыш налын, пашалан кожмак ӱдырамаш эсогыл отпускшо жапыште книгагудым почеш!..
– Маргарита, тений Тошто У ийлан кокымшо гана кова лийым! – ик кечын телефоныштем Нина Дмитриевнан оҥгыр гай йӱкшӧ йоҥгалте.
Тыгай уверлан кузе от йывырте? Илыш йыжыҥан гынат, тушто сайже, волгыдыжо, порыжо садак шукырак. Тидымак пеҥгыдемда Нина Лепёшкинан ӱмыгорныжо.
М.ИВАНОВА.
Снимкыште: З.Ермакова Нина Дмитриевналан у книгам кучыкта.
Авторын фотожо.
