УВЕР ЙОГЫН

Пашамат ыштат, капкылымат пеҥгыдемдат

9-10 декабрьыште Марий Элысе пашаче коллектив-шамыч коклаште кокымшо спартакиаде эртен. 

Ты кечылаште Йошкар-Оласе спорт объектлаште, тӱҥ шотышто «Арена» манежыште, «Спартак» ФОК-ышто, Вӱд спорт дворецыште, «шокшо» таҥасымаш эртен.

Ты гана команде-влак ныл тӱшкалан шелалтыныт. Шукыштлан тачысе саманлан келыштарыме манежыште лияш, вий-куатым тергаш келшен. Тидыжым чыла участник, манаш лиеш, палемден.

Кужу капан, таза кап-кылан ӱдырамаш ден пӧръеҥ команде-шамычын таҥасымыштым ончен, южгунамже пырля ушнен, полшымат шуын колтен. Поснак шочмо кундем гыч толшо шке команде верч тургыжланыме годым тыгай шонымаш лектеш. А участник-влак профессионал семынак модыныт.

Спартакиаде кок кече гӱжлен. Спортсмен-любитель-влак икымше кечын ӱстембал теннис, шахмат дене, мини-футболла модмаште, иймаште вийыштым тергеныт. Тыгак куштылго атлетике дене эстафете (4Х100м) оҥайын эртен. Кокымшо кечын «Спартак» ФОК-ышто волейболла модмаште моткоч тале таҥасымаш лийын. Туштат команде-влак иканаште кум залыште модыныт.

Участник-влак жапым пайдалын эртареныт: таҥасеныт, олам ончалыныт, икте-весе дене палыме лийыныт, но… Тыште адакат «но» дене серлагаш логалеш. Спартакиадыш чыла район гыч командым конден кертын огытыл. Тидыже, мутат уке, эн ончычак технике, шийвундо дене кылдалтын. Южо команде тичмаш лийын огылат, палемдыме чыла видыштак вийым терген огыл. Мутлан, Волжский районысо сборный шахмат дене модмаште да эстафетыште гына таҥасен. Тыгодым эстафетыште писылыкым ончыктымыжым палемдыман. Чаманен каласыман, адакшым «подставе» манме денат тӱкнаш логалын. Лач тидыжак шукыштым тургыжландараш да кидым лупшалын, ӧрдыжкӧ кораҥаш таратен.

Лекше кырча-марчам шотыш налде, таҥасымаш сай кӱкшытыштӧ эртен. Иктыланат у огыл: келшыше паша, пеҥгыде еш, физически да духовно вияҥаш йӧн – тачысе кечын ик эн тӱҥжӧ. А нацийын тазалыкшым пеҥгыдемден, элна куатаҥеш.

Спартакиадын тӱҥ шонымашыже тыгай: таҥасымашке оганизацийлаште ыштыше виян  физкультур коллектив-влакым ушаш да тале спортсменым ойыраш, ойыртемалтше командым палемдаш.

Муниципальный образованийласе сборный команде-влакын таблицыште верышт:

Команде Волейбол Мини-футбол ӱстембал теннис Иймаш Шахмат Куштылго атлетике эстафете Чылаже Вер

  1. «Волжск ола» ола округ 3 4 3 3 1 2 12 1
  2. Кужэҥер муниципальный район 4 5 4 1 7 1 15 2
  3. Шернур муниципальный район 9 1 2 4 4 4 15 3
  4. Медведево муниципальный район 1 6 1 7 2 7 17 4
  5. У Торъял муниципальный район 5 3 5 5 5 6 23 5
  6. «Йошкар-Ола ола» ола округ 9 7 7 2 6 3 25 6
  7. Килемар муниципальный район 2 2 8 8 8 9 28 7
  8. Волжский муниципальный район 9 9 9 9 3 5 35 8
  9. Мари-Турек муниципальный район 9 9 6 6 9 8 38 9

 

Е.ЭШКИНИНА

Опубликовать в Одноклассники

Добавить комментарий