Марий Элын Тазалыкым аралыме министерствыжын 2 ноябрь эрдене увертарымыж почеш, пытартыш суткаште регионын больницылаж гыч паремше 28 пациентым мӧҥгӧ колтымо, тыгодымак 52 черлым эмлалташ пыштыме. Тыге, теҥгече эрдене регионнан 10 инфекционный стационарыштыже медик-влак чылаже 1059 гражданым у коронавирус инфекций да пневмоний деч эмленыт. Ты чот гыч 188 пациент неле состоянийыште лийын, 23 черле шодым искусственно вентилироватлыме йӧн дене шӱлен, 429 еҥлан кислород кӱлын.
«Коронавирус: статистика» сайтын 2 ноябрьысе данныйже почеш, пытартыш суткаште Марий Элыште COVID-19 дене инфицироватлалтме 43 случайым регистрироватлыме. А пандемий пагытыште у коронавирус инфекций дене чылаже 6211 еҥ черланен, 5055 пациент паремын, 64 черле колен.
Газетнан пагалыме таҥже-влак, аралыза шкендам да лишыл еҥда-шамычым: киддам шовын дене чӱчкыдын мушса, маске, перчатке да антисептик дене пайдаланыза.
М.ИВАНОВА
