Йошкар-Олаште, С.Г.Чавайн лӱмеш национальный книгагудышто «Росгвардий: историй да кызытсе жап» фотовыставкым эртареныт.
Тудо Россий Федерацийын национальный гвардий войскаже-влаклан 27 мартыште 208 ий теммылан пӧлеклалтын.
Фотовыставкыште Марий Элысе Росгвардий управленийын подразделенийже-влакын ыштыме снимкышт ончыкталтыныт. Тыгак тудым эртарымаште книгагудо пашаеҥ-влак кугу полышым пуэныт. Нуно «Кугыжанышыште ласкалыкым оролышо-влак» книга ончерым ямдыленыт.
Мероприятийым управлений начальникын алмаштышыже подполковник Рамиль Аюпов почын. Тудо войска-влакын историйышт, ведомство ден подразделенийла ончылно шогышо цель ден задаче-влак нерген каласкален да Росгвардийысе войска-влак нерген фильмым ончыктен.
Вневедомственный охране отделын пашаеҥже-влак кызытсе жапысе оролымо средства, экипировко, саркурал выставкым ямдыленыт. Кумылан кажне еҥ «Тревога» сигнал кузе эртымым ужын да каске ден бронежилетым чиен ончен кертын.
ОМОН спецподразделенийын боецше-влакат пайдаланыме оружийыштым да индивидуальный аралалтмаш средства-влакым ончыктеныт.
Управленийын ветеранже-влак службым эртыме жапышт, Йӱдвел Кавказыште боевой действийлаште лиймышт, йолташышт-влакын геройлыкым ончыктымышт, Чечнясе икымше ден кокымшо кампанийла годым мом чытен лекмышт нерген шарналтен каласкаленыт.
Л.Камалетдинова.
