У Торъял районысо Овалже ял гыч Галина Романова пеледышым пакчаштыже веле огыл ончен кушта, эше шкеже ышта. Фетр куэм гыч. Ӱдырамашын ты пашалан шӱмаҥмыжлан улыжат пел ий утларак эртен.
— Тыгай кидпашам тӱҥалаш шонымашемже шукертак ыле, но ондакше нигузе ярсен кертын омыл. А кызыт уныкам ончаш кӱлеш да паша гыч лектынам, сандене яра жапем уло, — ойла самырык кова.
Мартыште Йошкар-Олаште эртыше Деловой ӱдырамаш-влакын форумышкышт Галина Николаевна моткочак шуко кидпашажым ончыкташ конден ыле. Нуным тӱслымем годым тудо палемдыш:
— Тыште – пелыже наре веле. Эше тынарак мӧҥгыштӧ уло. А мыняр пӧлекленам?!
— Тынар шуко ыштенда да ӧрканенат огыдал мо? – йодым.
— Уке-е. Могай ӧрканыме?! Мӧҥгешла, кунам тӱрлӧ тӱсан пеледышым ыштен шинчылтам, чонемлан туна-ар чот сайын чучеш! Ом шылте, тиде сомыл мылам моткочак келша! — куанжым шылтыде вашештыш ӱдырамаш.
Пеледыш-влакшым могайым да кузе ыштышашым кидмастар южыжым Интернетыште онча, мыняржым шкеже шонен луктеш.
Кызыт эн кугу шонымашыже – кӧргӧ гыч волгалтше кугу-у пеледышым ышташ. Такшым кугу-у пеледышыжым ыштенат шогалтен. Ынде тушко волгалтарыше настажым веле вераҥдаш кодын. Галина Николаевна ыштен шукта гын, тудым ончалаш такшым оҥай ыле…
Любовь Камалетдинова
Авторын фотожо.
