УВЕР ЙОГЫН

Пайрем кумылан погынымаш

Изарнян, 10 январьыште, Йошкар-Олаште Марий Эл Республикын кудымшо созыв Кугыжаныш Погынжын юбилей сессийже эртыш. Тудо Марий Эл Республикын Кугыжаныш Погынжылан 25 ий теммылан пӧлеклалтын ыле.

Ты гана мероприятий молгунамсе деч чотак ойыртемалтше лийын, вет сессийыш толшо-влакым фойеште республикысе И.С.Палантай лӱмеш тӱвыра да сымыктыш колледжын скрипач-влакын ансамбльышт вашлие. Шоктымо сылне семышт, очыни, кажнын чонышкыжо пайрем кумылым пуртыш.

Фойештак «Марий Эл Республикын Кугыжаныш Погынжо. 25 ий» ончер почылтын. Тушто Кугыжаныш Погынын куд созывшынат депутатыштын пашашт фото, тӱрлӧ савыктышыште лекше материал гоч ончыкталтыныт, награде-влакымат ужаш йӧн лийын.

Марий Эл Республик вуйлатыше Александр Евстифеевын да республикысе правительствын лӱмышт дене погынышо-влакым Марий Эл Республик правительстве вуйлатышын сомылжым шуктышо Сергей Сметанин саламлыш.

Россий Федерацийын президентшын Юл кундем федеральный округышто полномочный представительже Игорь Комаровын саламлымашыжым Марий Эл Республикыште тӱҥ федеральный инспектор Петр Журавлев лудын пуыш.

Тылеч вара Кугыжаныш Погын председатель Юрий Минаков «Марий Эл Республикын Кугыжаныш Погынжо. 25 ий» докладым ыштыш. Тудо парламентын чырык курым жапыште шуктымо пашаж дене радамынак палдарыш. 25 ий жапыште 212 сессий, президиумын 481 заседанийже, комитет-влакын 3515 заседанийышт эртаралтыныт, Марий Эл Республикын 1550 законжым приниматленыт. Тыгак Юрий Александрович кужу жап келшен пашам ыштымылан  республикысе калыклан, Марий Эл вуйлатышылан, правительствылан, молылан тауштен ойлыш.

Тылеч вара тӱрлӧ созыв Кугыжаныш Погынын  депутатше-влак: Владимир Мухин, Галина Варченко, Григорий Пейсахович, Валентина Злобина – республикын законодательный органыштыже пашам ыштымышт нерген шарналтен ойлышт.

Юбилей сессий кузе сылне сем йоҥгымо дене тӱҥале, тыгак мучашлалте: республикысе тӱвыра да сымыктыш колледжын самырык артистше-влак «О марийской земле» композицийым ончыктышт да «О, Марий Эл» мурым йоҥгалтарышт.

Любовь Камалетдинова.

М.Скобелевын фотожо.

Опубликовать в Одноклассники

Добавить комментарий