1941-1945 ийласе Кугу Отечественный сар нерген шинчавӱд деч посна шарналташат огеш лий. Тений 9 майыште Кугу Отечественный сарыште сеҥымашлан 75 ий темеш. Сеҥымашым лишемдаш полшышо ветеран-влакат республикыштына 277 еҥ кодын. Ме ветеран-влаклан вуйым савена. Нуно чыла нелылыкым сеҥен, гитлеровский Германий ден империалистический Японийым шочмо мланде гыч коженыт да у тукымлан ласка илышым пӧлекленыт. Ветеран кокла гыч иктыже – Михаил Дмитриевич Жданов. Тудо Зинаида Александровна пелашыж дене Мышино ялыште илат. Ме 8 майыште нунын деке пайрем дене саламлаш миенна. Нунылан кужу ӱмырым да пеҥыде тазалыкым тыланена.
М.СКОБЕЛЕВЫН фотожо
Снимкыште: 93 ияш Кугу Отечественный сарын ветеранже М.Жданов пелашыж дене
