Калыкын икоян улмо кечыжлан да Марий автономийым ыштымылан 99 ий теммылан пӧлеклалтше мероприятий-влак варажым Эрик Сапаев лӱмеш опер да балет кугыжаныш театрыште шуйненыт. Тушто республикысе правительствын представительже, Кугыжаныш Погынын депутатше, партий ден религиозный конфессий, предприятий ден организаций вуйлатыше, ӱжмӧ уна-влак лийыныт. Нунын ончылно икымше гана калык семӱзгар дене шоктышо всемарийский йоча оркестр шке мастарлыкшым ончыктен.
А тудын деч ончыч погынышо-влакым ты кок кугу кугыжаныш пайрем дене реион вуйлатыше Александр Евстифеев саламлен. Мутат уке, эн ончыч тудо Россий Президент В.Путинын саламлымашыжым лудын пуэн. Каласен кодыман: ты пайрем вашеш республикыште илыше калыкым элнан премьер-министрже Д.Медведев да РФ ФС Федераций советын председательже В.Матвиенко саламленыт.
А.Евстифеев калыкнан ончыко кайымаштыже эртыше ийлаште лийше кугу событий-влакым ушештарен. Пример шотеш Кугу Отечественный сарыште сеҥымашымат шарналтен. Шушаш ийыште тиде датылан 75 ий темеш. Эшежым Россий Президент 2020 ийым Шарнымаш да Чап идалык семын увертарен. Вес ийын эше кундемна Марий автономийын 100 ияш лӱмгечыжым палемда. Сандене ты кечым вуйлатышына курымаш лӱмгечылан пӧлеклалтше идалыкым палемдаш тӱҥалаш старт семын аклаш темлен. Тидын дене пырля пытартыш ийлаште могай сеҥымашке шумо нерген ушештарен коден. А ышталтынже шуко: марий рӱдоланам тӱзатымаште веле огыл, республик мучкат. Эшежым лишыл вич ийыштат федеральный кучем полшымо дене сай вашталтышым кондышо шуко у проект илышыш шыҥдаралтшаш, вет национальный проект-влак дене келшышын гына республикыш 54 миллиард теҥге толшаш. Тачысе кечылан гына республикысе 76 километр, оласе 10 километр кугорным олмыкытымо, кок йочасадым почмо, Оршанке районысо Марково ялыште у ФАПым почаш ямдылалтыт да шуко молат.
Саламлымаш деч вара Александр Евстифеев кундемнан вияҥмашкыже кугу надырым пыштыше да тӱрлӧ сферыште сай пашашт дене ойыртемалтше-влаклан кугыжаныш наградым кучыктен.
Почешыже трибуныш Марий Эл Кугыжаныш Погын вуйлатыше Анатолий Смирнов, Марий Элыште Тӱҥ федеральный инспектор Петр Журавлев лектын саламленыт.
А вара пайрем концерт тӱҥалын. Тыгай кугу оркестрым ужаш чынжымак куан лийын. Тушко мемнан республикысе 15 искусство школ, И.С.Палантай лӱмеш Тӱвыра да сымыктыш колледж гыч 100 наре эн сай тунемше-влакым чумыреныт. Шукышт тӱнямбал, Россий, республик кӱкшытан конкурслан лауреатышт улыт. Мутлан, баян дене шоктышо Константин Рябин сценыш солист семын икмыняр гана лекте, эсогыл тудым дирижёр семынат ужна. Моткоч талантан рвезе, таклан огыл тений Китайыште эртыше тӱнямбал конкурсышто тудым эн тале шым баянист коклаш пуртеныт. Концертыште классический произведений-влак дене пырля калык семат кызытсе обработко дене йоҥген. А торжественный пайрем гын всемарийский йоча хорын рушла да марла йонгалтарыме республикын гимнже дене почылтын.
Мучашлан оркестрын участникше-шамычлан регион вуйлатыше Александр Евстифеев деч шере пӧлекым кучыктеныт.
Каласен кодыман, ты кечын оласе чыла тӱвыра полат оҥай деч оҥай пайрем программе дене куандарен.
С.НОСОВА
