СПОРТ

Пайдалын каныза, кыртмен ямдылалтса

Тале ечызе Стас Егоров нерген ик гана веле огыл газетыштына возенна. Параньга район Куракино ялын эргыже кызыт ешыж дене Йошкар-Олаште ила. Шукерте огыл республик кӱкшытан таҥасымаште (тудыжо кок кече лийын) икымше верым налын. Финиш деч вара мутна рончалте. Коеш: спортсмен моткоч ноен.

– Икымше кечын кроссышто икымше лийынат, таче – кокымшо. Саламлем.

– Тау. Икымше кечын сайын да куштылгын куржын эрташ шоненам. Тыгак лекте. А кокымшын – шкан, уэмдыме трассым тергыме семын. Тиде шонымашат шукталте. Ече-роллерлан келыштаралтше трассе моткоч чапле. Ӱшанымылат ок чуч. Тау тыгай корным ыштыше-влаклан. Тидым ятыр ий вученна. Ончыкыжым эшеат кыртмен да куанен тренироватлалташ тӱҥалына. Шонымо результатым ончыкташ шукыштлан сай шӱкалтыш лиеш, шонем.

– Ты «Виктория» спорт школышто спортсмен-влаклан чыла йєн ышталтеш.

– Спорт дене заниматлалташ чыла уло. Мутлан, сай инвентарьым налме, упражненийым ышташ тренажёрымат келыштарыме. Кумылет веле лийже.

– Станислав, пытартыш жапыште куржталме денат тӱрлӧ сынан таҥасымашлаште, пелемарафоныштат виет тергет. Тидыже мо дене кылдалтын?

– Такшым ме, ечызе-влак, кугу объёмлан тунемынна. Санденак шкем тергыме семын пелемарафоныш ушненам. Озаҥ олаште икымше гана таҥасенам. Тунам виянрак куштылго атлет-влак вес вере миеныт, можыч, сандене призёр радамыш логалынам. Мыланем тиде вучыдымо лийын, но куаненам. Пелемарафонышто эн сай жапемже – 1 шагатат 9 минут.

– Тиде тыланет садак могай-гынат опыт лийын?

– Моткоч кугу. Телым ече дене коштмо годымат эше кӱлеш лиеш, шонем. Но иктым палемдынем: куржталаш шуко огеш кӱл. Йєнан кроссовкым, келшыше вургемым чий да чымалт веле. А ече спорт, чынжымак, шерге спорт. Костюмат кўлеш, шуко объёмым (тургымышто мыняр километрым эртыме) погыман. Тылеч посна сбор,  инвентарь, тренировко, йєнан ботинке… Тыгодым стартыш лекмеке, ечым мазь дене игечылан, корнылан келшышын от йыге гын, ямде улмет йӧршеш арам лийын кертеш.

– Тый тидын дене шкеак тӱкненат? Мурманскыште?

– Чын. Тунам пеш сай результатым ончыктен кертам ыле. Корнышто тоя дене веле шӱкен каяш логалын. Йыген ямдылыме ече ыш келше. Игечыжат, корныжат пуйто вашталте. Тунам умылышым: кеч-мыняр виян лий, тренироватлалт, ечым сайын от ямдыле гын, чыла арам лиеш. Техникетат ок полшо. Мыланем шукыж годым тренерем Евгений Григорьевич ямдыла. А тушко тудо миен кертын огыл.

– 2017 ийыште Йӱдвел пайремысе ечыгорнышто 15 километрыште кумшо верыш лектынат. Моткоч сай результат. А 2018 ийыште 50 километрым куржмаште финишыш 16-шо толынат. Тидат шкем тергыме семын лийын. Теве ынде куштылго атлетике дене Озаҥ олаште пелемарафон, арня гыч Киров областьыште – 30 километран таҥасымаш. Икмыняр кече гыч – эше кок старт. Шкем изиш аралаш кӱлеш.

– Тидын нерген шуко ойлаш лиеш. Спортсменын результатше шуко мо дене кылдалтын. Кочкышымат шотыш налман. Шуко огыл, но кӱлешаным, качестваным кочман. Массаж деч поснат огеш лий.

Киров областьыште кумло километрыште та‰асыме годым чаракым эртыме семын эҥер гоч куржын лектынна, вара умбакше ночко вургем дене куржынна. Тидыжат эше йєра… Йолем сусыртенам, чогашылат изиш коршта. Шкан эре уым кычалаш, илышыш могай-гынат ойыртемым пурташ кӱлеш, шонем. Лач тидым шотыш налын, тыгай кужытышто вием тергаш ушненам. Арам огыл куштылго атлет-влакат шкеныштым тӱрлӧ сынан таҥасымашлаште тергат. Келшем, конешне, икмыняр кугу таҥасымаш деч вара садак каналтыман. Мыйже «Виктория» спорт школлан, УОР-лан куржталам, сандене ты та‰асымашке лекташ кӱлешак шоналтышым.

Самырык тукымлан, спортын келшыше видше дене пеҥгыде кылым кучаш, физкультурлан кумылаҥаш темлем. Теве ынде «Корта» ече базыште спорт дене профессионально заниматлалташат, тыглай каналташат сай йєным ыштыме. Уна-влакланат сай вер. Яра жапым пайдалын эртараш тыршыман.

Е.ЭШКИНИНА мутланен.   

 

Опубликовать в Одноклассники

Добавить комментарий