21-27 сентябрьыште Казаньыште студент клуб-влак коклаште калыкле лиге слёт эртен. Ты мероприятийыште республикын чапшым Марий кугыжаныш да Юл кундем кугыжаныш технологий университетлаште тунемше кандаш ӱдыр-рвезе арален.
«Форумын пашаже кум ужашлан пайлалтын. «Ушем-влакын архитектурыжо» блокышто ик шонымаш дене ушемыш ушнышо кажне еҥын шуктымо пашажым радамлен ончыктеныт. Эре ончылно улшо, калыкым шке почеш вӱден моштышо самырык-влаклан «Комьюнити драйверы» направлений пӧлеклалтын ыле. Тӱрлӧ мероприятийым шонышо да тудым эртарымылан вуйын шогышо-влаклан – «Событийын конструкторжо».
Арня шуйнышо мероприятийын кажне кечыже пайдалын эртен. Шуко уым пален налынам да у йолташ-влакым муынам», – палдарыш МарГУ-со интеллектуал модмаш клубым вуйлатыше Алексей Кошкин.
О.МОШКИНА
