Марий Турек район Косолоп селаште шочын-кушшо тиде рвезе тений Российыште веле огыл, тӱнямбалнат шке мастарлыкше дене ойыртемалтын. Мутна Йошкар-Оласе строительный техникумышто тунемше Павел КАЗАНЦЕВ нерген.
— Павел, тений тый кугу сеҥымашке шуынат. Паша профессий-влакын «Worldskills» тӱнямбал чемпионатыштышт «Кермычым оптымаш» номинацийыште профессионализмлан медальон дене палемдалтынат. Кӱчык жапыште тыгай кӱкшытыш шумо корно могайрак?
— Косолоп школым тунем пытарымеке, строительный техникумыш тунемаш пуренам, молан манаш гын чоҥышын профессийже мылам изинек келшен. «Worldskills» тӱнямбал чемпионатыште сеҥымаш мылам куштылгын пуалтын огыл. Эн ончыч вийым Йошкар-Оласе тыгаяк конкурсышто тергенам, тушто кокымшо лийынам. Вара республикысе чемпионатыште сеҥышыш лектынам. Тыге мылам Юл кундемысе «Worldskills» чемпионатышке корно почылтын. Тушто изирак йоҥылышым ыштенам, туге гынат мыйым Российын сборныйышкыжо ойырен налыныт.
Тӱнямбал чемпионатыш кайыме деч ончыч Европышто тренироватлалтынна. Тушто мемнан сайынак ямдыленыт. Инструктор-шамыч шкем ласкан кучаш туныктеныт. Но тӱнямбал чемпионат нимогай экшык деч посна эртен. Тушто мый 22 шагатыште 600 кермычым пыштен шуктенам. Тыгодым чылажымат йоҥылыш деч посна ыштенам, сандене профессионализмлан медальон дене палемдалтынам. Тиде мылам моткоч куанле. Вет мастарлыкем тӱнямбал кӱкшытыштӧ акленыт. Тыгак Марий Элыштат именной стипендийым налме нерген дипломым шукерте огыл Самырык-влакын полатыштышт кучыктеныт. А Йошкар-Оласе кӱртньыгорно вокзалыште вашлиймаш мыйым поснак ӧрыктарен да куандарен. Чыла тиде мылам ончыко кушкаш, вияҥаш вийым пуа.
Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда.
Лидия ШАБДАРОВА.
М.Скобелеын фотожо.
