Марий Элын туризм шотышто комитетшын специалистше-влак республикысе районлаште верысе туризмым вияҥдыме йодышым кумдан каҥашат. Администраций-влакын пашаеҥыштлан районын тидлан культур, историй, пӱртӱс памятникын, вер-шӧр ойыртемын мом пуэн кертмыштым, тидлан предприниматель-шамычын могай полышым ыштен сеҥымыштым ончыл верыш шындат.
А шуко районыштыжо тидым ышташ йӧн шагал огыл. Мутлан, Шернур районышто эртарыме «йыргешке ӱстел» йыр мутланымаште экологий, этнографий, йоча туризмым вияҥдаш сай ончыкылык улмо нерген класеныт. Теве Кукнур кундемыште Йӱштӧ кузызан резиденцийже, поэт Н.Заболоцкийын лӱмжӧ дене кылдалтше сылнымут маршрут, кумдан палыме марий актер да поэт Йыван Кырлан лӱмжӧ дене кылдалтше экскурсий программе тидлан негыз лийын кертыт.
Советский районыштат шке кундемыш Российысе да йот элласе турист-влакым шукырак кумылаҥдымаште ятыр уым шыҥдараш лиймым палемдыме. Районышто ынде ятыр ий пашам ыштыше «Имне ӱмбалсе круиз» компанийын опытшылан эҥертен, турист бизнесыште у маршрутла ден экскурсий программым ямдылаш лиеш.
Республикысе туризм шотышто комитет председатель С.Звереван мутшо почеш, Оршанке район туризмым вияҥдышашлан пеш йӧнан вер-шӧран кундемыште верланен. Йошкар-Ола деке лишке, автотранспорт кугорно сай, молат. Сандене Марий Элыш толшо уна-влаклан кок-кум кечаш турпрограммым ямдылаш гын, районлан пайдаже ятырак лиеш. А Оршанкысе кресаньык паша да илыш-йӱла тоштерым шке элысе веле огыл, йо элласе турист-влакат шукертак йӧратен шынденыт. Тыште ешартыш услугым пуымым веле кумдаҥдаш кодеш. Сувенирым ужалаш лукташ, у анимаций программым ямдылаш, уна-шамычлан мастер-классым эртараш келшен толеш.
А тысе чаҥ да тӱрлӧ кугытан оҥгыр ден йыҥгыр-влак коллекций иктынат кумылжым савырыде ок кодо. Тудо туризмын у шӧрынжым: чаҥ ден оҥгыр-влакын йӱкыштым, историйым, православный культурым да шӱм-чон кумылым иктеш ушышо ойыртемалтше туризм программым — почаш негыз лийын кертеш.
А.АНДРЕЕВ.
Снимкыште: Оршанкысе кресаньык паша да илыш-йӱла тоштерысе чаҥ ден оҥгыр-влак тӱсышт дене гына огыл, йӱкышт денат «йылгыжыт».
