УВЕР ЙОГЫН

    Оҥайын да пайдалын эртен

   Йошкар-Оласе Сомбатхей избирательный округышто, 28-ше №-ан школ пелен стадионышто, Кудывечысе спорт кече эртаралтын.

Тудым рӱдоласе депутат-влак погынымашыште «Единый Россий» фракцийын членже-влак И.Стародубцева, А.Волков, А.Андреев ден О.Богатов организоватленыт.

— Мемнан округышто ты пайрем поро йӱла гайыш савырнен да изижланат-кугужланат келша. Тыгай мерприятий еҥ-влакым уша, чылаштым порыракым ышта. Эшеже уло еш дене яндар южышто жапым эртараш да йоча-шамычым спортлан шӱмаҥдаш сай амалым пуа, — палемден И.Стародубцева.

Пайремыш погынышо-влак мини-футбол дене таҥасымашым, спорт полосаште куржталмым, айкидо ден тэг-регби секцийыш коштшо-влакын мастарлыкыштым, руш лапта дене модаш туныктымым онченыт. Тылеч посна, амал дене пайдаланен,  ГИБДД пашаеҥ-влак кушкын толшо тукымлан корно правил нерген каласкаленыт.

Изиштат, кугуштат аныклаш

«Йошкар-Ола» ола округын администрацийже «Пырля – волгыдырак-2017» энергийым аныклымашке виктаралтше II Всероссийский фестивальыш ушнымо нерген увертарен.

Ты фестиваль элна мучко тений сентябрь-октябрьыште эртаралтеш, а тӱҥалешыже 6-7 сентябрьыште Владивостокышто Эрвел экономический форум эртыме жапыште. Йошкар-Олаште фестиваль 9 сентябрьыште Чарла Кремльыште 11 шагатлан почылтеш.

Тений 1 августышто элыштына «Энергоресурсым переген кучылтмо нерген декларацийым подписатлыме да Российын экономикыжым вияҥдымашке шке надырым пыштыме нерген» акций тӱҥалтышым налын. Тыге планетынан кажне еҥже шке элыштыже илышым сайракым ышташ, тыгак паша верыштыже да мӧҥгыштыжӧ, электровийым аныкленрак кучылтын, пайдалыкым нӧлталаш полшен сеҥа. Мутлан, пӧртыштӧ тошто лампычкым да быт техникым у дене вашталташ, шуко тарифан счетчикым шындаш неле огыл, кажныже ешысе еҥ-шамычым яра пӧлемыште тулым йӧртыде кодымо деч шижтарен, уто шокшым колтымо деч окнам петыраш туныктен ойлен сеҥа.

www.вместеярче.рф сайтыште чыла еҥлан энерговийым аныклен кучылтышаш верч декларацийым да элым светодиодан лампе дене пайдаланымашке писынрак кусараш ӱжмӧ шотышто петицийым подписатлаш темлалтеш.

Ласка корным ойырен нал

Рӱдолаште икымше классыш кайыше-влакын дневникыштышт школ марте эрташ лӱдыкшыдымӧ корно-влак ончыкталтыт.

Рӱдоласе Госавтоинспекций Йошкар-Ола администрацийын келшымыж дене нунылан лӱмынак «Мыйын лӱдыкшыдымӧ корнем» буклетым ямдылен. Тунемме ий тӱҥалтыште икшыве-влак ача-авашт, туныктышо да ГИБДД пашаеҥ-влак дене пырля тушан мӧҥгышт гыч школ марте да мӧҥгешла ласкан эрташ лийме корным сӱретлышаш улыт. Сӱретлышаш веле огыл, ты маршрутым сайын палышаш улыт. ГИБДД пашаеҥ-влак сентябрь мучко лӱдыкшыдымӧ корным чын ойырен налаш туныкташ тӱҥалыт. Тудым эреак ушышто кучаш манын, буклетым дневникыш пижыктен шындаш темлат.

Мут толмашеш, тений рӱдоласе школлаш икымше классыш кум тӱжем утла рвезе ден ӱдыр толыныт.

А.АНДРЕЕВ.

Опубликовать в Одноклассники

Добавить комментарий