Угарман кундем Тоншай районысо межпоселенский централизоватлыме клуб системыш пурышо Ошкӓтӓсола клуб-мастерскойышто ыштыше кидмастар Вячеслав Теркин тений адакат Нижегородский областьын Элкӧрго региональный да муниципальный политик министерствыжын грант конкурсыштыжо сеҥышыш лектын.
Кодшо ийын тудо грант окса кӱшеш традиционный Марий куэм мастерскойым почын гын, тений Марий этно-тӱвыра рӱдерым почаш шона. Ошкӓтӓсола кугужак ял огыл, 50 наре марий ила. Вячеслав Васильевичын ойлымыж почеш, Тоншай районышто тӱрысшӧ 2500 наре марий погына. Районысо тӱвыра пӧрт пелен чапланыше «Лекше вӹт» марий фольклор ансамбль пашам ышта. 2014 ийыште коллектив Нижегородский областьысе губернаторын «Душа России» премийже денат палемдалтын.
Вячеслав Васильевич ынде ятыр ий тудын чолга участникше. Тӱвыра аланыште 1983 ий гычак тырша. Шке жапыштыже Нижний Новгородышто тӱвыра да сымыктыш колледжым тӱшка калыклан мероприятий-влакым эртарыше режиссерлан тунем лектын. Кызыт ты клуб-мастерскойын пашажым виктара. Такшым, пӧръеҥ пу гыч арверым пӱчкедыше мастар. Тиде мастарлык тудлан шкежак толын, манеш. Суртышто кучылталтше пу гыч тӱрлӧ арверым, тыгак пӱкеным, олымбалымат ышта, окна сергамат ямдыла, тошто мебельымат уэмда. 2000 ийыште тудлан «Декоративно-прикладной сымыктыш да ремесло гильдийын мастарже» чап лӱмымат пуэныт. Тудо ийынак «Душа России» губернаторын премийжым сулен налын. 2003 ийыште пум пӱчкедыме да сӱретлыме шотышто мастар-влакын «Древо – 2003» икымше всероссийский конкурсыштат шке вийжым терген. 2006 ийыште областьыште эртаралтше пум пӱчкедымаш дене мастар-влакын «Северные узоры» кокымшо фестиваль-конкурсыштыжо «Плоскорельефная резьба» номинацийыште сеҥышыш лектын. 2008 ийыште нылымше гана эртаралтше тыгаяк конкурсыштат лауреат лийын. Декоративно-прикладной творчество дене кылдалтше тӱрлӧ кӱкшытан конкурс ден фестивальлашке марий пӧръеҥ эреак ушна. Тоншай районышто эртышышкыже гын, кажне гана. Сандене тале кидмастарым областьыштат сайын палат.
Вячеслав Васильевичын ойлымыж почеш, пу гыч пӱчкедыше мастарлан шотлалтеш гынат, тудлан клубын пашажымат тӱрыснек ворандараш логалаш. А кодшо ийын налме грант почеш эше тушто куэмым куымо пашам ворандарен колтен. Ончыч ты паша дене кылдалтше материалым чумырен, вара шке кундемыштак станокым кычалаш пижын. Кычалын да муын, иктым веле огыл. Тошто станок-влакым уэмден, пашаш колтен. Шкеже веле огыл куаш тӱҥалын, икмыняр ӱдырамашымат ты пашалан кумылаҥден кертын. Ойлымыж почеш, тачысе кечылан куд станок пашам ышта. Но ончыкыжым Вячеслав Васильевич лу марте шуктынеже. Куымо пашам тӱҥалмеке, кумылан-шамычлан мастар-классымат эртараш тӱҥалын. Но ты пашам ворандараш неле чер эпидемий мыняр-гынат мешаен.
Теве тыгай чолга марий Ошкӓтӓсолаште ила. Тудо пытартыш Марий калык погынышкат толын ыле. Эшежым тушто В.Теркиным Мер Каҥашын еҥжыланат сайленыт.
С.Носова
Снимкылаште: В.Теркин.
Фотом соцкылысе почмо лаштык гыч налме.
