2 февральыште Йошкар-Оласе «Спартак» ФОК-ышто «КЭС-БАСКЕТ» школысо баскетбол лигын республик кӱкшытан финалже эртен.
Ӱдыр-влак коклаште Кужэҥер посёлкысо 2-шо №-ан кыдалаш школ гыч сборный команде (тренер Л.Терёшин) сеҥышыш лектын. Тудо икымше вер верч Йошкар-Оласе 26-шо №-ан гимназий гыч ӱдыр-влак дене модын. Вашлиймаш 68:54 счёт дене мучашлалтын. Сеҥыше команде гыч эн сай модшылан Ирина Скворцовам палемденыт.
Кумшо вер верч таҥасымаште Йошкар-Оласе 28-ше №-ан школ ден Бауманский лицей гыч «КОТюша» команде-влак лийыныт. Кокымшыжо сеҥышыш лектын.
Рвезе-шамыч коклаште Йошкар-Оласе 11-ше №-ан школын «Орешки» дене «Мегатех» лицейын «Тасманские альпаки» командышт модыныт. Икымше верым «Орешки» команде налын. Кумшо верлан Марий Турек гыч «Тринитротолуол» ден Йошкар-Оласе 9-ше №-ан школын «Девятый вал» командышт вашлийыныт. Кокымшыжо призёр семын палемдалтын.
Сеҥыше команде-влак «КЭС-Баскет» школысо баскетбол лигын Юл кундем федерал округын финалыштыже вийыштым тергат.
Баскетбол дене чемпионатыште чыла общеобразовательный организацийлан мечым кучыктеныт.
Е.Эшкинина.
