Начар тазалыкан икшыве-влаклан образованийым да воспитанийым пуымо шотышто Козьмодемьянскысе школ-интернатын надырже моткоч кугу.
Тушто шке пашаштым сайын палыше специалист-влак тыршат, нуно мастарлыкышт дене республик кӱкшытыштат ойыртемалтыт: тенийсе «Педагогический мозаике-2021» конкурсышто школ-интернатын куд педагогшо сеҥышыш лектын.
Тиде – М.Толстова (1 степенян диплом дене палемдалтын), Н.Рыжкова, В.Денисова, Е.Ерофеева, Н.Казанцева да О.Спиридонова (снимкыште). Нуно «Посна образовательный йодмашан йоча-влак дене эн сай занятий» номинацийыште ончылно лийыныт. Профессионал конкурсышто чылаже мастарлыкым республикысе 10 педагог терген. Нуно туныктышо-влакын сообществыштым шке ойыртемалтше паша опытышт дене палдареныт, илыш дене тӧр кайымыштым, а эн тӱҥжӧ – начар тазалыкан йоча-влаклан келге да илышыштышт ик эн кӱлешан шинчымашым пуаш тыршымышт дене палдареныт.
Г.КОЖЕВНИКОВА
