Медведево посёлкысо «Витязь» ФОК-ышто мини-футбол дене «Ончыкылык шӱдыр-влак» турнир иктешлалтын.
Республик кӱкшытан таҥасымаште 2006-2007 ийлаште шочшо рвезе-влак вийыштым тергеныт. Турнирыште чылаже 12 команде таҥасен. Эн тале команде коклашке «Сернур» (Шернур), «Динамо» (Йошкар-Ола), «Марс» (Лӱльпан), «Зелёный ключ» (Йошкар-Ола), «Витязь» (Медведево) логалыныт. Изи футболист-влак мастарлыкыштым ончыктеныт да, виянрак командылан шотлалтше рвезе-шамыч дене модын, опытым погеныт.
«Витязь» клубын кубокшо Шернур посёлко гыч «Сернур» футбол клублан логалын. Рвезе-влак ӱшанлын икымше верым сеҥен налыныт. Кокымшыш «Динамо», кумшо верыш «Марс» команде-влак лектыныт.
Тиде турнирым эртараш «Шернур сырзавод» ЗАО полшен. Ойыртемалтше футболист-влаклан предприятийын пашаеҥже ыштен лукмо кочкыш сатум кучыктен.
Е.Эшкинина.
