Александр Евстифеев ден Йошкар-Олан мэрже Евгений Маслов оласе икмыняр кундемым пырля ончен лектыныт.
Ик йодышыжо Прохоров уремым волгалтарыдыме дене кылдалтын. А.Евстифеев деч полышым йодын возымаштышт еҥ-влак 2012 ий годсек тыгак Я.Крастынь да Черняков уремлаште 38-ше гыч 46-шо №-ан пӧрт-влак марте кумдыкым волгалтарыдымылан, а 44-ше номеран пӧрт воктене тротуар укелан вуйым шийыныт.
Йошкар-Ола администраций вуйлатышын алмаштышыже Антон Трудиновын палдарымыж почеш, уремыште тулым ышташ 350 метр кужытан ЛЭП-ым шупшман. Тиде пашалан 500 тӱжем теҥге наре кӱлеш.
А.Евстифеев тиде йодышым кӱчык жапыште рашемден шукташ кӱштен.
— Чыла пашам мучашлымешке, пӧртым приниматлыман огыл ыле. Пӧртым писынрак сдатлышашлан застройщик еҥ-влакым ондален, лектеш. Тиде амал дене ик квартал уремысе тул деч посна кодын. Кок арня гыч тушто тул лийшаш, — каласен тудо.
Республик вуйлатышын пашажым шуктышо тыгак тиде микрорайонышто корно укелан тӱткышым ойырен.
— Тышке толын шуаш мыланна пӧрт-влак коклаште кудалышташ перныш. А вес семын тышке логалаш огеш лий. Сандене проектым ямдылаш, сметым ышташ да тиде верыште кок велым кудалаш лийме корным ышташ планыш пурташ йодам. Тротуар лийшаш. Тудын дене тунемше-влак школыш коштшаш улыт. Тудым тенияк шуктышашлан мо лиймым чыла ыштыза. Лӱдыкшыдымылык икымше верыште лийшаш, — манын А.Евстифеев.
Машиностроитель урем, 128-ше номеран пӧртыштӧ верланыше тӱшкагудышто илыше-влак республик вуйлатышын пашажым шуктышылан коммуникацийым вашталтымылан кӧра пӧртйымалне вӱд шинчымылан да пырдыж шелышталтмылан вуйым шийыныт.
— Нине нелылык подрядчикын ыштыме пашажлан кӧра лектын да тиде пеҥгыдемдалтеш гын, тыште илыше-влак искым пуэн кертыт, олмыктымо пашалан кайыше оксам пӧртылташ правашт лиеш, — каласен А.Евстифеев.
Умбакыже пашаче группын еҥже-влак Фестивальный микрорайонысо Западный уремыште пеҥгыде быт отход ден чоҥымо материал деч кодшым кышкыме шкевуя ыштыме вер воктене шогалыныт. Тидат республик вуйлатышын пашажым шуктышылан келшен огыл.
— Участкым свалкыш савыраш иктат эрыкым ок пу. Сандене те застройщик дене мутланыза, тудо шӱкшакым кораҥдыже але тудын деч тиде мланде кумдыкым поген налза. Чыла тидым кызытак ышташ тӱҥалман, — каласен тудо.
А.Евстифеев Йошкар-Оласе Дружба уремыште цементым, рубероидым, бахчевой культурым ужалыме точко-влаклан тӱткышым ойырен. Ужалаш иктыжынат разрешенийже лийын огыл.
— Нунын шотышто административный протоколым возыза да нарушенийым ыштымым пеҥгыдынрак эскерыза. Ужалаш лӱмын ойырымо вер-влак улыт. Ужалыме правил чылаштлан икгай лийшаш, — палемден тудо.
«Коммунальник» сад товариществыште А.Евстифеевлан йӱр вӱдым йоктарыше канализаций уке, тидлан кӧра тушто эреак вӱд шинчыме нерген каласеныт. Ончыкыжым «Город» МУП-ын вийже дене тыште эрыктыме пашам эртарат, пучым пыштат да Коммунальный – 1-й пер. Коммунальный урем-влак ушнымаште корныш асфальтым шарат.
Шке участкылаштышт пакчасаскам ончен куштышо-влак дене кылым ыштыме сай опыт семын республик вуйлатышын пашажым шуктышо Прохоров ден Строитель урем-влак ушнымаште сад-пакчазе-влаклан сатуштым ужалаш посна верым ыштымым шотлен.
— Тыгай точко-влак олан кажне районыштыжо лийшаш улыт, — каласен Александр Евстифеев Йошкар-Олан мэрже Евгений Масловлан.
Республик вуйлатышын пашажым шуктышо тиде кечынак А.С.Пушкин лӱмеш скверыште лийын. Сквер вес Сеҥымаш кечылан уэмдалтшаш манын каласен.
Л.Камалетдинова.
