САМЫРЫК ТУКЫМ

Ола гыч — ялыш

Блогер, ныл эрге икшыван ава, сай пелаш – чыла тиде тачысе лаштыкын унаже Анастасия Охотникова нерген. Тудо Йошкар-Олаште шочын.  Тыштак ешаҥын. Пелашыже тале музыкант. Оласе самырык еш куд ий ончыч Оршанке район Ӱлыл Лопсола ялыш илаш куснен. У верысе илышыж нерген ӱдыр Instagram-ыже блогым вӱдаш тӱҥалын. Кызыт латкум  тӱжемат пеле наре интернет йолташыже уло. Мо нерген вара тудо тушто каласкала, айста пален налына.

– Настя, шукын ял гыч каяш тыршат, а те мӧҥгешла, тушто пӧртым чоҥеда, сурт вольыкым ончаш тӱҥалында, пакчасаскам куштеда…

– Тидым ышташ пелашем шонен пыштен. Ӱлыл Лопсолаште изи пӧртым налмына годым, икымше эргыналан ик ий наре лийын. Тудыжо эрыкан кушшо, ару южым шӱлыжӧ, пакча гыч шке сай саскам кочшо манын шоненна.

Ялысе шып, тымыкланже шкежат моткоч куаненна. Эре лӱшкышӧ машина йӱк уке. Коклан икыт-кокыт кудал каят, йоча-влак деке школ автобус толеш – тетла чыла. Олашке коштыктышо транспорт лиеш ыле гын сайрак ыле, но шке машинан-влаклан тидлан ойгыраш нимолан. Вет рӱдола марте тора огыл – 25-30 километр  гына. Вот тул чӱчкыдын пытен кая – тидыж деке тунем шуаш нелырак.

– Блогет мо нерген?

– Йоча, пакча, сурт- вольык, икманаш – ял илыш нерген. Ончыч тудо йӧршын вес сынан ыле. Ялыш логалмекем,  йолташем-влак кузе илымем, мом ыштымем нерген йодышташ тӱҥалыныт. Тудым каласкалыме шканемат оҥайын чучын. Тыге ончыкташ, палдараш тӱҥалынам.

Подписчик-влакем моткоч йӧратем. Удам возышыжо йӧршын уке манме деч, икмынярым шекланенам. Но порым шонышо-влакше моткоч ятырын улыт.

– Лаштыкыштет кинде сӱрет пеш чӱчкыдын коеш…

– Блог тӱҥалтыште лач тудым кӱэштмылан пӧлеклалтше лийын. Тиде пашам мый моткоч йӧратем. Тудым тӱрлӧ шуктыш (закваске) гыч ыштылам.

Тиде сомылыш кандаш ий ончыч, йоча дене шинчымеке (декретыште), ушненам. Шуко ӱдырамаш-влак ты годым шканышт у пашам кычалыт. Кочкаш ыштымаштат тӱрлылык лийже манын тыршат. Кӧ тортым ышта, кӧ сырым шолта, мый теве – киндым кӱэштам. Ончыч шуко тунемаш, кӱэшт ончаш логалын. Кызыт шкат тидлан еҥ-влакым туныкташ тӱҥалынам.  Мастер-класслам эртарем. Йошкар-Олаштат, Казаньыштат. Ик жап консультант семын республикынан киндым ямдылыше ик заводыштыжо тыршенам.  Интернет гоч онлайн-школым эртаренам. Кызыт шканем кӱэштам. Коклан йодмаш-влакат лектедат.

– Тыйын шонымаште ялын ончыкылыкшо уло мо?

–  Самырык-влак ялыште ешаралтыт. Мый тыгай чолга еш, ӱдыр-рвезе-влакым шагал огыл палем. Мутлан мемнан йолташна-влак пошкудо суртым налыныт. Подписчикем-шамыч коклаштат тыгай еҥ ятыр.

Вет тушто илаш кызыт пеш йӧнан. Шке пакчасаскам куштен ужалаш, але чонлан келшыше вес сомылым муын вораҥден колташ лиеш. Кумылда гына лийже.

Ял тӱзланыже манын шке илыш, паша дене примерым ончыктыман.

Блогым вӱдаш шонышо  еҥлан могай ой-каҥашым пуэт?

– Тидлан пижында гын – ида лӱд, ида йогылане. Шканда лишыл темым ойырен налза. Вет тыге те кеч-могай йодышлан вашештен кертыда, мом возашат эре лиеш. Тыланда оҥай гын, ончышо-влак тидым шижыт, у постым куанен вучаш тӱҥалыт.

Мый СММ специалист омыл гынат, каласен кертам: эн тӱҥ – интернет йолташ ончылно шкем чын кучаш, шойышташ огыл.

О.МОШКИНА

Опубликовать в Одноклассники

Добавить комментарий