«Единая Россия» партийын «Тачысе илышлан келшен толшо ола кумдыкым тӱзатымаш» федеральный проектше дене келшышын, Звенигово олаште икмыняр уремысе кудывечыште йоча площадкым почыныт.
Кудывече-влакым тӱзатыме пашам «ЖУК» ООО шуктен. Тидлан чылаже 2 миллионат 793 тӱжем теҥге каен.
Йоча-влаклан модашышт площадкым келыштарыме дене пырля шуко пачеран пӧрт-влак воктенсе кумдыкыш – корныш, тротуарыш, транспортым шогалтыме верыш – асфальтым шареныт, электротулым шупшыныт, икшыве-шамычлан модмо да спорт оборудований-влакым вераҥденыт.
Тиде куанле кече дене погынышо-влакым «Звенигово муниципальный район» муниципальный образований вуйлатыше, «Единая Россия» партийын верысе отделенийжын секретарьже Н.Козлова, Звенигово муниципальный район администраций вуйлатыше В.Геронтьев, «Звенигово ола шотан илем» муниципальный образований вуйлатыше Т.Цыганова, «ЖУК» ООО подрядный организаций вуйлатыше Д.Керимов саламленыт.
Йошкар тасмам пӱчкын, йоча площадкым почмеке, тӱвыра да каныме «Мечта» районысо рӱдерын пашаеҥже-влак йомак персонажыш «савырненыт» да икшыве-шамычлан куштымашан, тӱрлӧ конкурсан модыш программым эртареныт.
Л.Камалетдинова.
