Марий Эл вуйлатыше мотопомпым, тыгак пожарный ден утарыше-влаклан келшыше вургемым налаш 6,4 млн. утла теҥгем ойырен.
Республикын правительствыжын тыгай кӱштымашыжым регион вуйлатыше Александр Евстифеев 10 сентябрьыште подписатлен.
Документ дене келшышын, кугу чодыра пожар-влакым йӧрташ ямде лийшашлан 320 тӱжем теҥге окса 4 мотопомпым, 3,6 млн. утла теҥге чодыра пожар ваштареш кучедалше пожарный ден утарыше-влаклан посна вургемым налаш ойыралтеш. Тыгак 2,4 млн. утла теҥге чодыра пожарым йӧрташ шӱрымӧ-ӱйлымӧ материалым налме годым палемдыдыме роскотым петыраш кая.
* * *
13 сентябрьыште Марий Эл вуйлатыше Александр Евстифеев чодыра пожарым шижтарышашлан республикын правительствыжын резерв фондшо гыч Пӱртӱс поянлык, экологий да йырым-йырысе средам аралыме министерствыжлан 11,5 млн. теҥгем ешарен ойырымо нерген кӱштымашым подписатлен.
Тиде окса дене чодыра пожарым йӧрташ келшыше оборудованийым налаш палемдалтеш. Мутлан, 3 мотовездеходым, вер гыч верыш кусараш лийше 60 радиостанцийым, 1000 напорный рукавым, 360 ранец-огнетушительым, 120 противоэнцефалитный костюмым, пожарный-влаклан вургемым да йолчиемым, моло кӱлеш средствам налыт.
Марий Эл Республикым вуйлатышын организаций да
аналитике виктемжын уверже негызеш
Л.Камалетдинова ямдылен.