Крешене пайрем деч ончыч Звенигово районысо Какшамарий ялыште, Палантай тукымын уна пӧртыштыжӧ, верысе тӱвыра пӧрт пелен чумырымо «Ӱшанлык» калык фольклор ансамбль ожнысо йӱлам шарналтен да шинчыме касым эртарен.
Ансамбльын участникше-влак, ожнысо вургемым чиен, иктышт кидпашам ыштеныт: кӱнчылам шӱдыреныт, тӱрленыт, уа гыч атым ыштеныт; весышт газетым лудыныт, «азам малтеныт». Тыгодым ондакысе семынак пырля мурым муралтеныт, мутланен шинченыт, куштеныт. А верысе школышто руш йылмым да литературым туныктышо Светлана Владимировна Ильина нунылан ожнысо илыш, Крешене годым шуктымо йӱла, пале-влак нерген оҥайын каласкален.
Тыге еҥ-влак иквереш жапыштым веселан да пайдалын эртареныт. Тӱҥжӧ – йӱлам шарналтеныт.
Л.Камалетдинова.
