Неле гынат, посна улмо режимын кажне кечыжлан нимучашдымын тауштем.
Ончыч коронавирусын пандемийже, а вара утларак ямде да посна улмо режимым пуртымо, пашам ыштыдыме пагыт нерген официально увертарымеке, шылтыде возем, чонемлан моткочак каньысырын чучо, эсогыл лӱдым. Россий президентын указше почеш, шуко еҥым самоизоляцийыш колтышт гын, ме, журналист-влак, пашам ыштышна, тыгодым верлашкат лектын коштна. Корнышто, тӱшка транспортышто але иктаж вашлиймаште инфицироватлалтын да пытартыш гана ужын кутырен кертмым умылен, пашам ыштыдыме пагытлан ялыш кайыше йолташем-влак денат чеверласышым – от пале, ончылно мо вуча, вет телевизор ма радио дене йӱдшӧ-кечыже коронавирусын шучкылыкшо нерген ойлат, йот эллаште чер дечын йӧсыланен колышо-влак да нунын капыштым, лишыл еҥыштлан ончыктыде, ик шӱгарыш тойымо нерген сюжетым ончыктат. Тыгайым колыштын да ончен, таза улмо ӱмбачат орадыш каяш лиеш, очыни… Улыжат-укежат ик ӱдырем тулыкеш кодаш огыл манын, Роспотребнадзорын инфекций деч аралалтме шотышто темлыме чыла каҥашыжым тачат кӱлынак шуктем. Ончычшо инфекций мемнан кундемым огеш логал манын шонышым. Шонышым веле огыл, ӱшанышым! Но чер дечын икымше еҥын, 37 ияш ӱдырамашын, илыш гыч кайымекыже, ӱдырем ончылнак шортын колтышым – воктенет мунло еҥ, ӱшанле эҥертыш, пеҥгыде ваче уке, да чылажланат шке веле мутым кучет, чылажат тый да Юмо дене веле кылдалтын гын, тыге улмаш…
Вара… А вара шкемым кидыш нальым. Чылажат Юмын кумылжо дене ышталтеш, пӱрымаш дечат от шыл манын, черланыме да колымо деч лӱдмым чарнышым. Чонемлан палынак куштылго лие. Вуйлатышына пашам мӧҥгыштӧ ышташ темлыш, сандене ӱдырем дене шукырак мутланаш, тутло кочкышым ямдылаш, тымарте эре варалан кодымо сомылкам шке радамышкыже пурташ жап лекте… Посна улмо режимын кажне кечыжлан нимучашдымын тауштем. Тудо лушкыдырак чыла койышем пеш писын рашемдыш да тыгак писын почкалтарен лукто, шӱм-чонем эрыктыш да поремдыш, илыш рӱдем эшеат пеҥгыдемдыш, нелылыкым шып гына чытен, а лучо илен лекташ туныктыш, Юмо деке утыр лишемдыш… А ик кечын полмезе пагытышкем пӧртылтыш!
Шкафын ик полкыштыжо школышто да университетыште тунемме пагытлаште погымо чонлан шерге тӱрлӧ арверым – фотоальбомым, открыткым, серышым, книгам, кӱжгӧ тетрадьым, блокнотым, грамот ден дипломым – кучем. Жап ситыдымылан кӧра тушко лу ий логалын омыл ыле! А ты гана кажне арверым кучен, почын да лаштыклен ончышым, южыжым шыман ниялтышым, эсогыл шупшальым. Тунамсе жапым шарналтен, семынем шыргыжымат, шинчавӱд ташлен шортымат… Поснак студент пагытыште возымо почеламутем-влак чонешем логальыч. Шарнем, ойго толеш ма куан авалта – чонем йолташ ӱдыремлан але келшыме рвеземлан огыл, а кӱжгӧ тетрадьлан почам ыле. 30 ий ончычсо жап шинча ончыкем тачысе кече гай пӧртыльын тольо. Икмыняр татшым снимке дене ончыктем…
Посна улмо режим ик велым нелын – амалжым умылтараш огеш кӱл, шонем, вес велым чонлан пайдалын эртыш. Юмылан тау, родем, лишыл еҥем, палымем, пашам пырля ыштыме йолташем-влак чыланат сай-таза улыт. Вашке икте-весым ужына да кажне кечым, куанен вашлийын, тауштен ужатен илаш тӱҥалына манын ӱшанем. Вет илышыште мо ышталтеш гын, чылажат – айдемын чон пайдажлан.
Маргарита ИВАНОВА
