Инвалид-влакын декадышт эртыме жапыште Йошкар-Оласе «Сосновая роща» интернат-пӧртын пашажым немыч коллеге-шамыч акленыт.
Тӧнежыш пеш оҥай делегаций толын. Тудын составыштыже Юл кундем кугыжаныш технологий университетын да Митвайде оласе (Германий) университетын социальный паша факультетшын еҥже, ПГТУ-н социальный технологий факультетыштыже стажировкым эртыше-влак Ильза Янет Ресслер-Дрехзель ден Томас Лефлер лийыныт.
Интернат-пӧртыштӧ илыше-влак Германий гыч толшо уна-шамычлан концертым ончыктеныт: совлам кырен, сылне семым луктыныт, муреныт, куштеныт. Инвалид-влакын декадыштлан ямдылыме концерт чылалан келшен. Тылеч посна уна-шамыч тиде тӧнежын илышыжым шке шинчашт денак ужыныт, нуно интернат мучко коштын савырненыт, «Милосердий» отделенийыш, усталык мастерскойыш, мончаш пурымо-вургемым мушмо комплексыш, Юмым сӧрвалыме пӧлемыш пуреныт, психолог-влакын занятийыштым онченыт.
Немыч специалист-влакым поснак тӧнежыште пайдаланыме тӱрлӧ технологий ден оборудований ӧрыктареныт. «Интернат-пӧртын ончыкылыкшо уло. Те республикыште илыше-влакым пеш сайын ончен кертыда. Ме тыште тӱнямбал стандартын йодмыжлан келшен толшо кызытсе жаплан келшыше технологийым ужна», – палемден Ильза Янет Ресслер-Дрехзель. – А усталык мастерскойышто ыштыме произведений-влак эсогыл эн пеҥгыдын йодшо критик-шамычым ӧрыктарат».
Немыч уна-влак тидымат палемденыт: интернат-пӧртласе ласка илыш кеч-могай элыштат социальный тӧнежлаште пашам ыштыше-шамыч дене кылдалтын. Тидымак шотыш налын, Ильза Янет Ресслер-Дрехзель ден Томас Лефлер «Сосновая роща» интернат-пӧртын пашаеҥже-влаклан илалше ден инвалид-влакым тыге умылен, чаманен да йӧратен ончымыштлан тауштеныт.
М.ИВАНОВА
