Марий Эл вуйлатыше Александр Евстифеев Россий кӱкшытан совещанийыште лийын, тудым РФ экономике вияҥмаш министр Максим Решетников видеоконференций семын эртарен.
Каҥашыме годым элысе субъектлаште социальный да экономике ситуаций могай улмо, тыгак коронавирус инфекций шарлыме лӱдыкшӧ условийыште уда палдырнымым иземдаш полшышо могай мерым ышташ лийме нерген мутланыме.
Экономике вияҥмаш министр Максим Решетников каласен: эпидемий ваштареш палемдыме режим да тудын дене кылдалтше чарыме мере экономикыште палдырныде огыт керт, тидын дене келшышын «бизнеслан шӱлалташыже» йӧным пуыман.
Марий Элыште социальный да экономике ситуаций пеҥгыде. Тений январь-февральыште республикысе предприятий-влак 22,7 миллиард теҥгеаш промышленный продукцийым колтеныт, производство индекс 105,6 процент лийын. Кушмаш обрабатыватлыше производствын 11 видыштыже палдырнен.
Регионысо потребительский рынкыште ак пеҥгыде, кочкыш продуктлан йодмаш утыжым кугу огыл. Южо сату шотышто гына шуко налаш тыршыме койыш изишак палдырнен.
Чарыме мероприятийлан кӧра паша рынкыште нелылык ынже лек, посна предприятийлаште ситуаций ынже удаҥ манын, пашаеҥым шагалемдыме, тӱрыс кече огыл, тыгак жаплан мӧҥгыштӧ ыштымашке куснымо – чыла эскералтеш.
Пашам пуышо-влак чыла тидын нерген увертарен шогышаш улыт.
Ю.Исаков ямдылен.
