Руш калыкын тыгай ойжо уло: «Кушто шочынат, туштак кӱлеш лийынат». А теве мемнан тачысе унана, Марий Турек кундемын шочшыжо Анатолий Ямбарцев, шке пиалжым Бразилийыште муын. Тудо тушто 2003 ий гыч ила. Математике науко кандидат тусо ик эн чапланыше Сан-Паулысо Математике да статистике институтышто вероятность теорий да матстатистике дене лекцийым лудеш. Илыш йолташымат тудо олаштак вашлийын. Маргарита пелашыже дене кок шочшым ончен куштат. У ийлан чылан пырля лӱмын Марий Элыш толыныт. Анатолийын ача-аваже шешкыштым ынде кокымшо гана вашлийыт. Икымше ганаже нуно кандаш ий ончыч кеҥежым лийыныт. А кызыт Ритан У ий пайремым илыше кож воктене эртарымым ончалаш кумылжо лектын.
Ме мӱндыр уна-влак дене кодшо рушарнян Йошкар-Оласе Ленин площадьыште эртыше марий ёлко годым вашлийынна. Ӱжмына почеш нуным Йошкар-Олаш Марий Турек гыч марий мер толкынын чолга еҥже Светлана Конышева конден ыле.
— Уло еш дене шочмо велыш толын каяш йӧнжат эреж годым уке. Оксат шагал огыл кӱлеш да корныжат кӱчык огыл, самолет дене гына 16 шагатым чоҥештыман, — каласыш Анатолий.
Тудын дене мутланыме жапыште Рита уло кумылын марий пайремым ончыш. Тудлан чылажат моткоч келшыш. Кеч уремыште иктаж вич градус наре йӱштӧ веле лийын гынат, шокшо вел гыч толшо ӱдырамаш изишак кылмен. Но шинчажым ош лум ынже йымыктаре манын, шем шинчалыкым чиен ыле.
— Мемнан дене тыгай йӱштӧ уке. Тушеч лекме годым Сан-Паулышто 36 градус шокшо лийын. Сандене мый тыгай игечым нелынрак чытем. Анатолийын аваже куртко йымаке мотор пеледышан меж шовычымат пидыктен, но садак йӱштӧ. Йӱштылан кӧрак кок ӱдырнамат Йошкар-Олаш пырля ышна кондо, — каласыш тудо вашлийме годым.
Вате-марий латныл ий пырля илат. Ончыч Анатолий пелашыжын ачаж дене палыме лийын. Тудат ончычсо Совет Ушемыш пурышо Прибалтик кундем гыч: шке жапыштыже ачаж ден аваже ончыч Аргентиныш эмигрироватленыт, вара Бразилийыш кусненыт. Ритан аваже японко: тыгак ешыже сар деч вара Бразилийыш эмигрироватлен. Анатолий шкеже марий, но марла умыла гынат, ок мутлане. Аваж ден ачаже кызыт Марий Турекыштак илат. Сандене ты ешлан уло кӧ деке унала толаш. Уна лияш веле огыл, Ямбарцевмыт тыште кум тылзе наре илаш шонат. Анатолий паша графикшымат тидлан лӱмын келыштарен. А йоча-влакын Бразилийыште кызыт кеҥежымсе каникулышт тӱҥалын. Кок ӱдырыштынат Российысе гражданствышт уло, сандене тиде пагытлан Марий Турек посёлкысо школыш тунемаш каят. Ты шотышто школ директор дене мутланенат келшеныт. «Руш йылмым сайынрак палаш тӱҥалыт манын ӱшанем», — манеш пӧръеҥ. Икшыве-влак дене пырля Ритат руш йылмым тунемаш шона.
Кумданрак — «Марий Эл» газетын
2017 ий 30 декабрьыште лекше номерыштыже лудын кертыда.
Светлана Носова.
М.Скобелевын фотожо.
