СПОРТ

Мӧҥгыштат, школым тунем лекмекат…

Волжский районысо Сотнур кыдалаш школышко пурымекына, спортзал велым ӱдыр-влакын йӱкышт шергылте. Южгунамже куанен, южгунамже –  кумыл волен. Йол пуйто шкеак тушкыла тарваныш. Ошкыльым огыл мо   спортзал велыш. Тыште ик гана веле огыл лиялтын. Жапше годым шкеат тиде спортзалыште эртыше таҥасымаште вием тергенам. Чон вургыжмо гай лие. Омсам почмо ылят, ончалде шым чыте. Ӱдыр-влак баскетболла модыт. Омса воктене рвезе-влак ончен шогат. Ӧрдыжтырак физкультурым туныктышо Руслан Михайлов умылтарен шога. Такшым южышт пеш писын да чаткан модмышт дене вигак ойыртемалтыт. Баскетбол мече корзиҥгашкат шолт да шолт веле пуреҥгая.

– Баскетбол дене таҥасымашке каяш ямдылалтына, тренировкымат чӱчкыдынрак ышташ тыршена, – умылтарыш Руслан Сергеевич.

Р.Михайлов Сотнур кыдалаш школышто 30 ий пашам ышта. Ӱдыр-рвезе-влакым физкультурлан, спортлан кумылаҥда, таза илыш-йӱлалан шӱмаҥда. Тунемшыже-влак дене тӱрлӧ таҥасымашке лектыт, ӧрдыж кундемыштат лийыныт, Россий кӱкшытыштат вийым тергеныт, тергат да сай результат дене пӧртылыныт.

Жап шыгыр. Шуко кучаш огыл манын, туныктышо икмыняр жапым ойырыш.

Мутна рончалте.

– Руслан Сергеевич, коеш, ӱдыр-рвезе-влак урокыш куанен коштыт.

– Такшым але марте тыге ыле. Умбакшат тыгак лиеш манын  шонена.

– Тидыже мо дене кылдалтын? Ӱдыр-рвезым кумылаҥден, туныктен  мошташ, сымыстараш кӱлеш. Опытат ятыр ий дене погына.  

– Тидыже уло. Эше урок деч вара ешартыш семын секцийым эртарена: йоча-влак баскетболла модыт, ече дене коштыт, СОБР клубын членже-влак военно-патриотический секцийыш толыт. Физкультур урокшым кум туныктышо вўдена.

– Пашаштыда мом эн тӱҥлан шотледа?

– Чынжым гын, ӱдыр-рвезе-влак шке гыч  шуаралтышт шонена, кумылышт лекше манын туныктена. Варажым мӧҥгыштышт, школым тунемын лекме деч варат кумылышт ынже йом манын шонена.   

– Тазалыкым шотыш налын, лушкыдырак-влаклан посна группо уло мо?

– Мемнан дене тыгай уке. Мӧҥгешла. Кугурак, нелырак программе дене туныкташ тыршена. Результат лектеш. Мутат уке, тышке эркын-эркын шуаш тыршена.

– Программыжым шке ямдыледа?

– Такшым паша программе почеш туныктена. Теве баскетбол дене программым шкеак ямдылем.

– Спорт ӱзгар шотышто кузерак? Таҥасымашлашке лекме годым шуко вере да чӱчкыдынак физкультурым туныктышылан шке кӱсен гыч шийвундым луктын пышташ логалеш.  

– Тыгаят лийын. Ик жап школ администрацият таза илыш-йӱла верч вуйын шоген, полшен. Кызыт тидын шотышто нелырак. Жапше годым, грантым сеҥен налмеке, ече комплектымат налме. Кызыт улыж дене пайдаланена, адакшым ача-ава-влак шке налыт.  

– Ик гана веле огыл Россий кӱкшытан таҥасымаште вийдам тергенда. Республикын чапшымат араленда.  Тидын нерген ала  рашрак умылтареда ыле?

– Икымше гана 2011 ийыште Анапа олашке, президент состязанийышке,  миенна. Тунам ончыч республикыште сеҥышыш лектынна ыле. Вара кеҥеж гоч тренировкыш коштынна. Тӱҥалтышлан ял гыч мийыше, ӧрмалгенна, опыт уке… Варажым чылалан тунемалтеш. 2012, 2014 ийлаште президент  модмаште лийынна. А  2014  ийыште вич кубок (команде дене – кумыт, личный – кокыт) дене пӧртылынна. Тунам куштылго атлетикыште Дима Ушков кокымшо верым  сеҥен налын. Эстафетыште кокымшо вер. Маунтинбайкыште чыла коклаште Стас Михайлов кумшо верыш лектын. Маунтинбайкыште пеш сайын выступатленыт.

– Маунтинбайк. Тидыже могай вид? Тыланда неле лийын огыл?

– Курыклаште велосипед дене кудалыштыныт. Меже ялысе улына. Велосипед дене кудалыштын моштат. Чылажат сайын эртыш, моло деч нимыняр почеш кодмо огыл. 80 утла команде коклаште 11 вер – сай результат, шонем.

– Чарак лийын, садак могай-гынат нелылык лектын?

– Кок вид: иймаш ден лӱйылтмаш шеҥгек шӱкалыныт. Тунам Ямал-Ненец  автономный округ да Татарстан гыч сайын выступатленыт. Ял гыч мийыше-шамычлан иймаште садак нелырак лийын. Ме тунам Звениговыш тренировкыш коштынна. Такшым тӱҥалтыште куштылго атлетикыште кокымшо верыште, эше икмыняр видыште ончылнырак каенна. Теве тыге. Тӱҥлан иймашым ыштеныт, сандене тидлан лийын шеҥгек шӱкалалтына.  

Эше ик нелылык дене тӱкнаш логалеш. Ондак каяшыжат куштылгырак ыле. 

Кызыт тӱрлӧ документым погаш, ямдылалташ  жап шуко кӱлеш. Варажым кайымат ок шу.

– Президент состязаний ден президент модмаште ойыртем уло?

– Уло. Президент модмаште вич вид обязательныйыш пура гын, состязанийыште тестым решатлаш кӱлеш, творческий конкурслан ямдылалташ… Чылажланат ончылгоч кыртмен ямдылалтман.

– Кызыт могай таҥасымашлан ямдылалтыда?

– «КЭС-Баскет» школ баскетбол лигын районный турнир тӱҥалын. Такшым ӱдыр-рвезе-влак сайын модыт, тыршат. Рвезе-влак команде икымше, ӱдыр-влак команде кокымшо лийыныт. Ты видыште ик сай шӱкалтыш уло: участвоватлыше, призёр радамыш логалше командылан баскетбол мечым пуат. Тидын дене йоча-влакым эшеат кыртмен модаш кумылаҥдат.

– Пеш кугу тау. Сай результатым тыланен кодына.

Шуко школышто физкультур урокым энтузиаст-влак, опытан-шамыч туныктат. Паша лектышышт денат куандарат, результатышт уло. Ты школышто Руслан Сергеевич Михайлов шкежат йоча-влаклан сай пример семын шотлалтеш. Ик гана веле огыл еш команде дене районын, тыгак  республикын чапшым всероссийский ялысе модмаште арален. Ече дене секцийым вӱдымекше, воспитанникше-влак республик кӱкшытыштӧ сеҥыше да призёр радамыш лектыныт. Сандене пашаштыже кеч-могай нелылык лектеш гынат (тидыж деч посна ок лий), сеҥен лекташ, ончыкшымат сай кӱкшытым, творческий шӱлышым, тазалыкым, тунемшыже-влаклан сай результатым тыланена.

Е.Эшкинина.

Снимкылаште: Сотнур команде черетан сеҥымаш деч вара, спортзалыште баскетболла модмо тат.

Авторын фотожо.

Опубликовать в Одноклассники

Добавить комментарий