У Торъял районысо межпоселенческий рӱдӧ книгагудо пелен чумырымо пеледышым ончен-кушташ йӧратыше-влакын «Флорина» клубыштын погынымашышт лийын.
Кеҥеж пагыт деч вара эртыше икымше занятийыште клубын участницыже-влак шыжым мӧҥгыштӧ куштымо пеледышым кузе ончаш кӱлмӧ нерген мутланеныт. Тидын дене пырля сад участкыште ландшафт дизайным кузе ышташ лийме нерген икмыняр видеофильмым пырля онченыт. Тыгак ӱдырамаш-шамыч шке сад-пакчаштышт мом ончен-куштымышт, могай кидпашам ыштымышт нерген икте-весыштым палдареныт.
Л.КАМАЛЕТДИНОВА
