ПАТЫРЛЫК

«Мый шке верыште улам»

Эртыше кечылаште Озаҥ оласе пычалтар заводышто кугу пожар лийын. Тидын нерген Российысе телеканаллаштат репортажым ончыктеныт. А варажым шучко увер толын: тусо туткар годым, лӱдыкшӧ зонышто разведкым эртарымаште, Волжский районышто шочын-кушшо марий рвезе, Россий МЧС-ын пашаеҥже, элкӧрго службын капитанже Эдуард Илларионов колен. Специалист-влакын рашемдымышт почеш, лач тудын туткарым кораҥдыме радамым раш палемдымыжлан да икымше ошкыл-влакым сайын ыштымыжлан кӧра лӱдыкшым иземден кертме. Лач Э.Илларионовын вуйлатыме  расчётшо пожарым йӧрташ ик эн ончыч кудал миен. Капитан караулын личный составшылан магистральный линийым келыштараш, да пожарный автомобиль-влакым вераҥден, тулым йӧрташ тӱҥалаш задачым шынден.

 А пычалтар заводым тул деч утарен кодаш куштылго огыл. Ик ошкылым йоҥылыш ыштет, чыла пудешталт кертеш. Тушто ЧП-жат чӱчкыдын лиеден улмаш. Ты ганат пожар кугу лийын. Кугу пудешталтмаш лийын кертмым Эдуард ончылгоч сайын пален. Капитанын, обстановкым аклен налын, раш кӱштымашым ыштымыжак туткарым кораҥдаш да утарыше йолташ ден завод пашаеҥ-влакымат  утарен кодаш полшен. Пожарым кок шагат наре йӧртеныт.

Шкеже ты жапыште лӱдыкшӧ зонышто разведкым эртараш пижын. Еҥ-влакын тушто кодмыштым да пожарым кузе сайрак йӧртымым рашемдаш кӱлын.  Но пудешталмаш годым утарыше чот сусырген, варажым вашкеполыш машина дене эмлымверыш наҥгайыме годым колен. Тудлан 37 ий веле лийын.

Татарстан Республикыште Российысе следственный комитетын органже-влак Казаньысе пычалтар заводышто пожар лийме амал почеш уголовный делам тарватеныт. Негыз семын пожар лӱдыкшӧ улман объектлаште лӱдыкшыдымылык правилым пудыртмашым ончыктеныт.  

Эдуард  Илларионов 1980 ий 15 февральыште шочын. Тудо Россий МЧС-ын пожар ваштареш кучедалше службыжын Урал кугыжаныш университетшым тунем лектын. Караулын начальникше должностьышто шкенжым профессиональный специалист да сай вуйлатыше семын ончыктен. Аралыме объект-влакын оперативно-тактический характеристикыштым да производствын могай технологий лӱдыкшыдым ыштен кертме процессшым  сайын пален.  Пожар але учений годым караулжын шуктымо пашажым моштен виктарен, эре гаяк лӱддымылыкым ончыктен. Ятыр гана кугу туткарым кораҥдымаште лийын да сай пашажлан, йолташыже-влакым шындыме задачым сайын шукташ виктрен моштымыжлан ведомственный награде дене палемдалтын. Кок ий ончыч Озаҥ пычалтар заводышто пожарым йӧртымӧ годым илышлан  лӱдыкшым ыштыме  дене кылдалтше условийыште шке служебный долгым шуктымо годым лӱддымылык ден патырлыкым ончыктымылан «За отвагу» медальым кучыктеныт улмаш. Тыгак тудын Россий МЧС-ын «За заслуги», «Маршал Василий Чуйков» шарнымаш, «За отвагу на пожаре», «За отличие в службе» кумшо да кокымшо степенян медальже-влак лийыныт. 

Пожарно-строевой, физический ямдылалтме годым занятийым сайын эртарымыжат палемдат. «Мастер» квалификаций званийже лийын. Россий МЧС-ын Татарстанысе Тӱҥ управленийжым вуйлатыше Рафис Хабибуллинын ойлымыж почеш, Эдуардлан  вуйлатыше должностьымат ик гана веле огыл темленыт, но тудо заводын спецификыжым паленат, тушанак пашаш кодын. «Мый шке верыште улам», — ойлен шкеж нерген Эдуард Илларионов. Тидым йолташыже-шамычат пеҥгыдемдат. Ласка, еҥ-влак дене мутланен моштышо рвезе лийын. Чаманен каласыман, ешымат поген шуктен огыл улмаш. «Тудын пелашыже пашаже лийын», — ойлат лишыл еҥже-влак. Тыге тудын нерген  официальный источниклаште возат.

Эдуард Илларионов — журналист, поэт Вадим Ларионовынын эргыже. Ачаже  илыш гыч эр каен. Аваже Фаина Илларионова кум икшывым шкет йол мбаке шогалтен. Эдуардын эше шольыж ден шӱжарже улыт. Нунылан иза чыла шотыштат пример лийын. А ончыкылык пашажым армий ойырен налаш полшен. Срочный службым тудо пожарный утарыше семын эртен.

26 мартыште Эдуард Илларионов дене  Россий МЧС-ын  Татарстанысе Тӱҥ управленийыжын манежыштыже чеверласеныт. Лишыл еҥже, пашам пырля ыштыше йолташыже-влак лийыныт. Поро шомакым пычалтар завод директор Халил Ганиятов, Россий МЧС-ын Рӱдо аппаратшын представительже Александр Бабкин  ойленыт. Пычалтар заводым утарен кодымаште Илларионов икмыняр гана ойыртемалтын улмаш. 

27 мартыште Геройым тудым шочмо кундемыштыже тоеныт. Колымыж деч вара элкӧргӧ службын капитанже Эдуард Илларионовлан Мужество орденым кучыкташ палемдыме.

Светлана Носова.

Снимкыште: Эдуард Илларионов ден чеверласыме годым.

Фотом Интернет гыч налме.

 

Похоронят Эдуарда Игнатьева сегодня, 27 марта, на кладбище деревни Пинжан Кукмор Волжского района, на родине офицера.

 

Опубликовать в Одноклассники