Татарстанысе Агрыз район Пелемеш тӱвыра пӧртыштӧ Российын кечыжлан пӧлеклалтше «Мый Российым чапландарем» пайрем концерт эртен.
Буймо школын да Пелемеш тӱналтыш школ-садын икшывышт чапле номер дене калыкым куандареныт. Нуно тачысе сем почешат кушталтеныт, оҥай сценкым модыныт, почеламутым лудыныт, марлат, рушлат муралтен пуэныт. Варажым чыланат «Мыйын Россием» мурым йоҥгалтареныт.
— Икшывына-влак, те элнан ончыкылыкшо улыда. Тачысе усталыкда дене элнам йӧратымым да пагалымым ончыктенда. Умбакыжат тыгаяк чолга лийза, усталыкдам шуарыза. Шочмо ялдамат ида мондо. Те улыда гын, кундемна умбакыжат илаш, тӱзланаш тӱҥалеш, — чон почын каласеныт Буймо ден Пелемеш школ-влакын директорышт Э.Михайлов ден В.Шурметова.
Л.МИХАЙЛОВА.
Авторын фотожо.
Снимкыште: Буймо ден Пелемеш школын уста икшывыже-влак.