АКЦИЙ КОНКУРСЫ КУЛЬТУР ДА ИСКУССТВО

Мыйын республикем, мыйын Россий

Кажне шыжым Я.Эшпай лӱмеш Марий кугыжаныш филармоний «Марий шыже» фестиваль дене калыкым ӧрыктара. Теният тудо республикыштына илыше-влаклан чапле пӧлкым ямдылен: вашке Марий Эллан – 100 ий темеш. Тидын вашеш Маргосфилармоний «Мыйын республикем, мыйын Россий» фестиваль-марафоным эртара.

Фестиваль 6 ноябрьыште Сеҥымашын XXX идалыкше лӱмеш культур полатыште кугу концерт дене почылтеш. Тушто филармонийын коллективше-влак («Марий Эл» кугыжаныш куштышо ансамбль, тудын пеленысе мурышо группо, «Марий кундем» калык семӱзгар оркестр, А.Искандаров лӱмеш Марий кугыжаныш капелле) да унала толшо «Италмас», «Православный Дон», «Нальмэс» ансамбль-влак мастарлыкым ончыктат.

7 ноябрьыште М.Шкетан лӱмш Марий национальный драме театрын сценыштыже Удмуртийын рӱдолаж гыч Калык келшымаш орден дене палемдалтше А.В.Мамонтов лӱмеш мурышо да куштышо академический «Италмас» ансамбльын концертше лиеш. Тудын лӱмжӧ тӱня мучко чапланен, Российысе калык лӱмым сулышо профессионал коллектив-влаклан эртаралтше тӱрлӧ конкурсышто эреак сеҥышыш лектеш. Ансамбльын репертуарыштыже кугу верым удмурт калыкын куштымашыж ден мурыжо айлат. Концертлаштышт финн-угор калык-влакын йӱлашт да тӱвырашт дене палдарат,  П.И.Чайковскийын произведенийжымат колышташ темлат. «Италмасын» «Скамейка», «Лён», «Чапкыса эктон» да моло куштымашыже-влак поснак калыкым куандарат.

Тиде кечынак Волжскышто да Йошкар-Олаште «Православный Дон» войсковой муниципальный фольклор ансамбльын концертше лиеш. Артист-влак «Марий кундем» калык семӱзгар оркестрын шоктымыж почеш мураш да кушташ тӱҥалыт.

А 14 ноябрьыште мемнан деке Татарстанын мурышо да куштышо кугыжаныш ансамбльже унала толеш. Тудо Сеҥымашын XXX идалыкше лӱмеш культур полатыште мастарлыкым ончыкта.  Артист-влак мурышт да куштымашышт гоч  татар калыкын тӱвыраж ден йӱлажым, ыштыш-кучышыж ден сем ойыртемжым  почын ончыктат. Концерт программышт тӱрлӧ легенде, лирике шӱлышан поэме ден мыскараланат поян.

Фестиваль 22 ноябрьыште мучашлалтеш. Ты кечын Сеҥымашын XXX идалыкше лӱмеш культур полатын сценыштыже Адыгей гыч калык куштымаш дене палдарыше «Нальмэс» академический ансамбль озаланаш тӱҥалеш.

Тудо Йӱдвел Кавказыште веле огыл, Российыштат виян профессиональный коллективлан шотлалтеш. «Нальмэс» тӱня мучко кугу да чапланыше концерт заллаште мастарлыкым ончыкта. Тудын репертуарыштыже шке калык куштымашыж ден музыкшо кугу верым айлат. Артист-влак мотор да шинчалан перныше вургемышт дене веле огыл, а мастарын куштымышт дене кумылым нӧлтат да шокшо кидсовышым сулат.

Икманаш, республикнан кугу лӱмгечыжлан пӧлеклалтше фестиваль калык ушеш шуко жаплан шарнаш кодшаш, вет кажне коллектив профессионал улмыж дене ойыртемалтеш, сандене кажныжым шке шинча денак ужаш кӱлеш!

А.БАЙКОВА

Фотом Маргосфилармонийын архивше гыч налме

Опубликовать в Одноклассники

Добавить комментарий